ప్రపంచ దేశాలపై డొనాల్డ్ ట్రంప్ విధించిన టారిఫ్‌లను (దిగుమతి పన్నులను) రద్దు చేస్తూ అమెరికా సుప్రీంకోర్టు సంచలన తీర్పునిచ్చింది. కాంగ్రెస్ (అమెరికా పార్లమెంట్) అనుమతి లేకుండా టారిఫ్‌లు విధించడం ద్వారా అధ్యక్షుడు తన అధికార పరిధిని ఉల్లంఘించారని కోర్టు పేర్కొంది. ఈ చారిత్రక విజయం వెనుక ఉన్న వ్యక్తి భారత సంతతికి చెందిన ప్రముఖ న్యాయవాది, అమెరికా మాజీ యాక్టింగ్ సాలిసిటర్ జనరల్ నీల్ కత్యాల్.
కోర్టులో నీల్ కత్యాల్ వాదనలు: ట్రంప్ 1977 నాటి ‘ఇంటర్నేషనల్ ఎమర్జెన్సీ ఎకనామిక్ పవర్స్ యాక్ట్’ (IEEPA)ను దుర్వినియోగం చేస్తూ రాజ్యాంగ విరుద్ధంగా పన్నులు విధించారని కత్యాల్ వాదించారు. “అధ్యక్షుడు శక్తివంతుడే కావచ్చు, కానీ మన రాజ్యాంగం అంతకంటే బలమైనది. అమెరికాలో పన్నులు విధించే అధికారం కేవలం కాంగ్రెస్‌కు మాత్రమే ఉంది” అని ఆయన స్పష్టం చేశారు.
ఎవరీ నీల్ కత్యాల్? నీల్ కత్యాల్ తల్లిదండ్రులు భారత్ నుండి అమెరికాకు వలస వెళ్లారు. ఆయన తండ్రి ఇంజనీర్, తల్లి డాక్టర్. చికాగోలో జన్మించిన నీల్, యేల్ లా స్కూల్ నుండి పట్టా పొందారు. మాజీ అధ్యక్షుడు బరాక్ ఒబామా హయాంలో ఆయన యాక్టింగ్ సాలిసిటర్ జనరల్‌గా పనిచేశారు. అమెరికా సుప్రీంకోర్టులో ఇప్పటివరకు 50కి పైగా ప్రధాన కేసులను వాదించిన రికార్డు ఆయన సొంతం. గతంలో ట్రంప్ విధించిన ‘ట్రావెల్ బ్యాన్’ను కూడా ఈయనే సవాలు చేశారు. అందుకే ఆయన్ని ‘ట్రంప్ లీగల్ హెడేక్’ (ట్రంప్‌కు చట్టపరమైన తలనొప్పి) అని పిలుస్తారు.
టాస్ వేసి మరీ అవకాశం: ఈ కేసులో వాదించే అవకాశం కోసం న్యాయవాదుల మధ్య టాస్ (సౌండ్ కాయిన్) వేశారు. అందులో నీల్ కత్యాల్ విజయం సాధించి, ప్రధాన న్యాయవాదిగా తన వాదనలను వినిపించి గెలుపొందారు. ఈ తీర్పును ట్రంప్ విమర్శిస్తూ “ఇది ఒక తెలివితక్కువ నిర్ణయం” అని సోషల్ మీడియాలో పేర్కొన్నారు.