మధ్యప్రదేశ్ రాష్ట్రం గ్వాలియర్‌లో కోచింగ్ క్లాస్ ముగించుకుని తన అక్కతో కలిసి ఇంటికి తిరిగి వస్తున్న 5 ఏళ్ల బాలుడిపై ఒక ఆవు అత్యంత దారుణంగా దాడి చేసిన ఘటన తీవ్ర కలకలం రేపింది.
మురార్ ప్రాంతంలోని శివహరే కాలనీలో గోవింద్ అనే బాలుడు తన సోదరితో కలిసి నడుచుకుంటూ వెళ్తుండగా, వీధిలో నిలబడి ఉన్న ఆవు ఒక్కసారిగా పంజా విసిరి బాలుడిపై దాడికి దిగింది. బాలుడు తప్పించుకోవడానికి ప్రయత్నించినప్పటికీ, ఆ ఆవు వదలకుండా వెంబడించి తన కొమ్ములతో పొడుస్తూ, కాళ్లతో తొక్కుతూ విచక్షణారహితంగా దాడి చేసింది.
కళ్లముందే తమ్ముడు ప్రాణాపాయ స్థితిలో ఉండటం చూసి తట్టుకోలేక ఆ చిన్నారి సోదరి గట్టిగా అరుస్తూ చుట్టుపక్కల వారిని సాయం కోసం పిలిచింది. స్థానికులు వెంటనే స్పందించి కర్రలతో ఆవును కొట్టి తరిమే వరకు అది బాలుడిని వదల్లేదు. తీవ్ర రక్తస్రావంతో ఉన్న బాలుడు గోవింద్‌ను ఆసుపత్రికి తరలించగా, తల భాగంలోనే 25 కుట్లు పడ్డాయి. ప్రస్తుతం బాలుడు ఐసియు (ICU)లో అత్యవసర చికిత్స పొందుతున్నాడు.
వీధుల్లో ఇష్టారాజ్యంగా తిరుగుతున్న పశువులను, కుక్కలను నియంత్రించడంలో మున్సిపల్ కార్పొరేషన్ విఫలమైందని స్థానికులు తీవ్ర ఆగ్రహం వ్యక్తం చేస్తున్నారు. ఈ దాడికి సంబంధించిన సిసిటివి దృశ్యాలు ప్రస్తుతం సోషల్ మీడియాలో వైరల్ అవుతూ అందరినీ కలిచివేస్తున్నాయి.