భారత క్రికెట్ జట్టు మాజీ కెప్టెన్ ఎంఎస్ ధోనీకి రాంచీలో ఉన్న భారీ ఫామ్‌హౌస్‌లోకి ఇటీవల ఓ విషపూరిత నాగుపాము ప్రవేశించింది. దీంతో అక్కడ కొంతసేపు తీవ్ర కలకలం రేగింది.
ఫామ్‌హౌస్‌లో పాము సంచరిస్తుండటాన్ని గమనించిన సిబ్బంది వెంటనే అటవీశాఖ అధికారులకు, పాములను రక్షించే రెస్క్యూ బృందానికి సమాచారం అందించారు.
సమాచారం అందుకున్న వెంటనే అక్కడికి చేరుకున్న స్నేక్ రెస్క్యూ టీమ్.. ధోనీ ఫామ్‌హౌస్‌లో ఉన్న నాగుపామును ఎంతో జాగ్రత్తగా సురక్షితంగా పట్టుకుంది. పాముకు ఎలాంటి హాని కలగకుండా రక్షించిన అనంతరం, దానిని సమీపంలోని సురక్షితమైన అటవీ ప్రాంతంలో విడిచిపెట్టారు. దీంతో ఎలాంటి అవాంఛనీయ ఘటన జరగకుండా నివారించగలిగారు.
క్రికెట్‌కు రిటైర్మెంట్ ప్రకటించిన తర్వాత ధోనీ రాంచీలోని తన విశాలమైన, పచ్చని ఫామ్‌హౌస్‌లో కుటుంబ సభ్యులు, పెంపుడు జంతువులతో ఎక్కువ సమయం గడుపుతున్నారు. వ్యవసాయం, గుర్రాల పెంపకం వంటి కార్యకలాపాలతో ప్రకృతి ఒడిలో ఉండే ఈ ఫామ్హౌస్ ఎప్పుడూ ధోనీ అభిమానుల దృష్టిని ఆకర్షిస్తూనే ఉంటుంది.
చుట్టూ దట్టమైన చెట్లు, పచ్చదనంతో విస్తారమైన ప్రాంతంలో ఈ ఫామ్హౌస్ ఉండటంతో.. అక్కడ అప్పుడప్పుడు వన్యప్రాణులు, పాములు వంటి సరీసృపాలు సంచరించడం సహజమేనని స్థానికులు చెబుతున్నారు.
అదృష్టవశాత్తూ రెస్క్యూ సిబ్బంది వెంటనే స్పందించి నాగుపామును సురక్షితంగా పట్టుకోవడంతో అందరూ ఊపిరి పీల్చుకున్నారు. అయితే ధోనీ ఫామ్‌హౌస్‌లోకి నాగుపాము ప్రవేశించిన ఘటన ప్రస్తుతం సోషల్ మీడియాలో, క్రికెట్ అభిమానుల్లో చర్చనీయాంశంగా మారింది.