అమెరికాలోని ఇడాహో (Idaho) రాష్ట్రానికి చెందిన ‘క్రిస్ హా’ అనే వ్యక్తి, తన తల్లిదండ్రుల ఇంటి తోటలోకి వెళ్లినప్పుడు, అక్కడ పొదల మధ్య దాగి ఉన్న ఒక రకమైన అత్యంత విషపూరితమైన పామును తొక్కాడు.
దీంతో కోపానికి గురైన ఆ పాము, అతడిని రెండు సార్లు దారుణంగా కరిచింది. పాము కరిచిన కొద్ది నిమిషాల్లోనే క్రిస్ ఆరోగ్య పరిస్థితి అత్యంత విషమంగా మారింది.
అతని నాలుక మొద్దుబారిపోయి, లాలాజల గ్రంథులు వాచి, శ్వాస తీసుకోవడంలో తీవ్రమైన ఇబ్బంది ఏర్పడింది. వెంటనే అతడిని సమీపంలోని ఆసుపత్రికి తరలించారు. పాము విషం అతని రక్తనాళాల్లో నేరుగా కలవడం వల్ల, శరీరంలోని అన్ని భాగాలలో అసాధారణంగా రక్తపు గడ్డలు (Blood clots) ఏర్పడే ఒక అరుదైన మరియు ప్రాణాంతకమైన ఇన్ఫెక్షన్ అతనికి సోకింది. క్రిస్ ప్రాణాలను కాపాడేందుకు వైద్యులు తీవ్రంగా శ్రమించారు.
ప్రాథమిక చికిత్స అందించిన ఆసుపత్రిలో ఉన్న 36 యాంటీ వెనమ్ (విష నిరోధక) ఇంజక్షన్లు అయిపోవడంతో, అతడిని వెంటనే హెలికాప్టర్ ద్వారా స్టాన్ఫోర్డ్ మెడికల్ సెంటర్కు తరలించారు. అక్కడ అతనికి మరో 18 ఇంజక్షన్లు ఇచ్చారు. అలా మొత్తం 54 విష నిరోధక ఇంజక్షన్లను క్రిస్ శరీరంలోకి ఎక్కించారు. సాధారణంగా పాము కరిచిన వారికి కొన్ని ఇంజక్షన్లు సరిపోతాయి, కానీ ఇతనికి 54 ఇంజక్షన్లు వేయడం వైద్య చరిత్రలోనే అత్యంత అరుదైన విషయంగా భావిస్తున్నారు. సుమారు 12 రోజుల పాటు తీవ్ర చికిత్స విభాగం (ICU) లో మరణంతో పోరాడిన తర్వాత క్రిస్ ప్రాణాలతో బయటపడ్డాడు.
అయితే, అతను కోలుకున్నాడనే సంతోషాన్ని జరుపుకునే లోపే, ఆసుపత్రి యాజమాన్యం ఇచ్చిన బిల్లు అతని కుటుంబ సభ్యులను షాక్కు గురిచేసింది. ఐసీయూ గది అద్దె మరియు ఒక్కో యాంటీ వెనమ్ ఇంజక్షన్ ధర 13,000 డాలర్లుగా లెక్కించి, మొత్తం 1.3 మిలియన్ డాలర్లు.. అంటే భారతీయ కరెన్సీలో సుమారు 11 కోట్ల రూపాయల బిల్లు వేశారు. ఇన్సూరెన్స్ (భీమా) ఉన్నప్పటికీ, ఈ మొత్తంలో కొంత భాగాన్ని తమ సొంత చేతుల నుండి ఎలా చెల్లించాలో తెలియక ఆ కుటుంబం ప్రస్తుతం ఆందోళన చెందుతోంది.