ఉత్తరప్రదేశ్‌లోని రాంపూర్‌ కోర్టు ఆవరణలో ఓ కుటుంబ వివాదం కేసు విచారణకు వచ్చిన సమయంలో అనూహ్య ఘటన చోటుచేసుకుంది. తన భర్త తనకు తెలియకుండా రెండో పెళ్లి చేసుకున్నాడంటూ ఆరోపించిన ఓ మహిళ… కోర్టు ప్రాంగణంలోనే భర్తపై చెప్పుతో దాడి చేసింది.
గాజియాబాద్‌కు చెందిన ఓ మహిళకు, రాంపూర్‌కు చెందిన ఓ వ్యక్తికి కొంతకాలంగా కుటుంబ వివాదం కొనసాగుతోంది. ఈ వ్యవహారానికి సంబంధించి రాంపూర్‌ కోర్టులో కేసు కూడా పెండింగ్‌లో ఉంది.
ఈ క్రమంలో మంగళవారం కేసు విచారణకు ఇద్దరూ కోర్టుకు వచ్చారు. అక్కడ వారిద్దరి మధ్య ఒక్కసారిగా వాగ్వాదం మొదలైంది. మాటామాటా పెరగడంతో పరిస్థితి తీవ్రంగా మారింది.
ఈ సమయంలో తన భర్త తనకు తెలియకుండా రెండో పెళ్లి చేసుకున్నాడని ఆ మహిళ ఆరోపించింది. దీంతో తీవ్ర ఆగ్రహానికి గురైన ఆమె… తాను వేసుకున్న చెప్పును తీసి భర్తపై దాడి చేయడం ప్రారంభించింది.
అనుకోకుండా జరిగిన ఈ దాడితో భయపడిన భర్త… ఆమె నుంచి తప్పించుకునేందుకు కోర్టు ఆవరణలో పరుగులు తీశాడు.
అయితే ఆ మహిళ మాత్రం అతడిని వదలకుండా వెంబడించి మరీ చెప్పుతో కొట్టింది.
ఈ ఘటనను చూసిన కోర్టులోని ప్రజలు, న్యాయవాదులు ఒక్కసారిగా షాక్‌కు గురయ్యారు.
అక్కడ భద్రతా విధుల్లో ఉన్న ఇద్దరు మహిళా పోలీసులు వెంటనే అక్కడికి చేరుకుని… ఆ మహిళను అదుపులోకి తీసుకున్నారు. అనంతరం భర్తను ఆమె దాడి నుంచి కాపాడి సురక్షిత ప్రాంతానికి తీసుకెళ్లారు.
ఈ ఘటనను అక్కడున్న కొందరు తమ మొబైల్ ఫోన్లలో వీడియోగా చిత్రీకరించి సోషల్ మీడియాలో పోస్ట్ చేశారు. ప్రస్తుతం ఆ వీడియో సోషల్ మీడియాలో వైరల్‌గా మారింది.
అయితే ఆమె చేసిన రెండో పెళ్లి ఆరోపణలో నిజమెంత అనేది పోలీసుల దర్యాప్తు, కోర్టు విచారణలో తేలాల్సి ఉంది.
కోర్టు ఆవరణలోనే జరిగిన ఈ చెప్పుల దాడి ఘటన రాంపూర్‌ ప్రాంతంలో తీవ్ర చర్చకు దారితీసింది.
Leave a Reply