బస్సులో ఒక మహిళ తీసిన వీడియో వల్ల సోషల్ మీడియాలో ‘వికృతుడు’గా ముద్రపడి, అవమానం భరించలేక ఆత్మహత్య చేసుకున్న దీపక్ గురించి నటుడు హరీష్ కనారన్ ఒక హృదయ విదారక విషయాన్ని వెలుగులోకి తెచ్చారు. అదే బస్సులో ప్రయాణించిన ఒక అమ్మాయి దీపక్ గురించి చెప్పిన మాటలు ప్రతి ఒక్కరూ వినాలి.
హరీష్ కనారన్ పోస్ట్ సారాంశం: “సోషల్ మీడియా ఎవరినైతే తప్పుగా చిత్రించిందో, అదే దీపక్ గురించి ఏడాది క్రితం జరిగిన ఒక సంఘటనను ఒక అమ్మాయి గుర్తు చేసుకుంది. ఆ అమ్మాయి అదే బస్సులో దీపక్ పక్కన కూర్చుని ప్రయాణిస్తున్నప్పుడు, ఆమె నెలసరి (Periods) నొప్పిని భరించలేక ఇబ్బంది పడుతోంది. అది గమనించిన దీపక్, ఆమెను పలకరించి విషయం అడిగాడు. ఆ అమ్మాయి మౌనంగా ఉండటంతో, మీ అమ్మకు ఫోన్ చేసి చెప్పమంటావా అని అడిగాడు. అంతేకాకుండా, తన బ్యాగ్‌లో ఉన్న పారాసిటమాల్ టాబ్లెట్లను ఆమెకు ఇచ్చి సాయం చేశాడు.”
ఆమె మనసు మళ్లించడానికి చదువు గురించి మాటలు కలిపాడు. పరీక్షలంటే భయంగా ఉందని ఆ అమ్మాయి చెప్పగా.. “చూడు, ఈ వయసులో కూడా నేను జీవితంతో పోరాడుతూనే ఉన్నాను. జీవితం ఎప్పుడూ ఇలాగే ఉంటుంది. కానీ నేను భయపడుతున్నట్లు కనిపిస్తున్నానా?” అని ఆమెలో ధైర్యం నింపాడు. ఆ ప్రయాణమంతా ఆమెకు ఎంతో తోడుగా ఉండి, కంఫర్టబుల్‌గా ఉండేలా చూసుకున్నాడు. అందుకే ఏడాది తర్వాత టీవీలో దీపక్ ఫోటో చూడగానే ఆమె గుర్తుపట్టింది.
ఎప్పుడూ ఇతరుల పట్ల శ్రద్ధ చూపే దీపక్, తాను చేయని తప్పుకు ప్రపంచమంతా నిందిస్తుంటే భరించలేకపోయాడు. సున్నిత మనస్కుడైన ఆయనకు చావు తప్ప మరో మార్గం కనిపించలేదు. తన అమాయకత్వాన్ని నిరూపించుకోవాలని కూడా ఆయన అనుకోలేదు. ఒకవేళ ఆయన చనిపోకపోయి ఉంటే, లోకం అతడిని నిందిస్తూనే ఉండేది అనేది ఒక చేదు నిజం.