బ్యాంక్ ఖాతాదారులకు ఏప్రిల్ 1వ తేదీ నుండి కొత్త నిబంధనలు అమలులోకి రానున్నాయి. భారత రిజర్వ్ బ్యాంక్ (RBI) ఈ మార్పులను తీసుకొస్తోంది. అయితే, ఈ నిబంధనలు అందరు ఖాతాదారులకు వర్తించవు. కేవలం BSBDA (బేసిక్ సేవింగ్స్ బ్యాంక్ డిపాజిట్ అకౌంట్) కలిగి ఉన్న వారికి మాత్రమే ఇవి వర్తిస్తాయి.
BSBDA ఖాతా అంటే ఏమిటి?
దీనిని సాధారణంగా ‘జీరో బ్యాలెన్స్’ ఖాతా అని పిలుస్తారు. దీనిలో కనీస నిల్వ (Minimum Balance) ఉంచాల్సిన అవసరం లేదు. SBI, HDFC, ICICI వంటి ఏ బ్యాంకులోనైనా ఈ ఖాతాను తెరవచ్చు లేదా పాత ఖాతాను దీనికి మార్చుకోవచ్చు.
ఏప్రిల్ 1 నుండి అమలయ్యే 7 ముఖ్యమైన మార్పులు:
- అపరిమిత డిపాజిట్లు:
డిజిటల్ లావాదేవీలు, ఆన్‌లైన్ బదిలీలు, చెక్కులు లేదా నగదు రూపంలో ఈ ఖాతాలోకి ఎంతైనా నగదు డిపాజిట్ చేసుకోవచ్చు. దీనికి ఎలాంటి అదనపు ఛార్జీలు ఉండవు. బ్యాంకులు అపరిమిత డిపాజిట్ సౌకర్యాన్ని కల్పించాలి. - ఉచిత చెక్ బుక్:
ప్రతి సంవత్సరం కనీసం 25 చెక్కులు కలిగిన చెక్ బుక్‌ను ఉచితంగా అందజేస్తారు. ఈ చెక్కుల ద్వారా చేసే లావాదేవీలకు లేదా కొత్త చెక్ బుక్ జారీకి ఎటువంటి రుసుము వసూలు చేయకూడదు. - ATM ఛార్జీల మినహాయింపు:
సాధారణ ఖాతాలకు వర్తించే వార్షిక ATM ఛార్జీలు ఈ BSBDA ఖాతాదారులకు ఉండవు. ఏటీఎం-కమ్-డెబిట్ కార్డును ఎటువంటి అదనపు రుసుము లేకుండా వాడుకోవచ్చు. ఏటీఎం ద్వారా నగదు విత్‌డ్రా చేసినా ఛార్జీలు పడవు. - ఉచిత నెట్ బ్యాంకింగ్:
ఈ ఖాతాదారులకు మొబైల్ బ్యాంకింగ్ మరియు ఇంటర్నెట్ బ్యాంకింగ్ సేవలను బ్యాంకులు ఉచితంగా అందించాలి. ఈ సేవల వినియోగానికి ఎటువంటి రుసుము వసూలు చేయబడదు. - ఉచిత పాస్‌బుక్ సేవలు:
బ్యాంక్ లావాదేవీల వివరాలను నమోదు చేసుకోవడానికి పాస్‌బుక్ ఉచితంగా ఇస్తారు. నెలవారీ ఖాతా స్టేట్‌మెంట్‌లను కూడా ఉచితంగా పొందవచ్చు. - లావాదేవీల పరిమితి:
నెలవారీగా కనీసం 4 ఉచిత ఏటీఎం లావాదేవీలు (విత్‌డ్రాయల్స్) కల్పిస్తారు. అయితే, గూగుల్ పే (Google Pay), ఫోన్ పే (PhonePe), పేటీఎం (Paytm) వంటి డిజిటల్ యూపీఐ (UPI) లావాదేవీలకు, అలాగే NEFT, RTGS బదిలీలకు ఎటువంటి నెలవారీ పరిమితి ఉండదు. - కనీస నిల్వ అవసరం లేదు:
ఈ ఖాతాలో ఎల్లప్పుడూ కొంత సొమ్ము ఉండాలనే నియమం లేదు. ఖాతాను తెరిచి, అప్పుడప్పుడు లావాదేవీలు చేస్తూ దాన్ని యాక్టివ్‌గా ఉంచితే సరిపోతుంది. వినియోగానికి ఎలాంటి మెయింటెనెన్స్ ఛార్జీలు ఉండవు.