కృత్రిమ మేధ (AI) సాంకేతిక పరిజ్ఞానం అభివృద్ధిపై ప్రపంచవ్యాప్తంగా చర్చ తీవ్రతరమవుతున్న వేళ, మైక్రోసాఫ్ట్ సహ వ్యవస్థాపకుడు బిల్ గేట్స్ కీలక వ్యాఖ్యలు చేశారు. ఏఐ వల్ల రాబోయే భారీ మార్పులను ఎదుర్కొనేందుకు ప్రపంచ దేశాల ప్రభుత్వాలు ఇంకా పూర్తిస్థాయిలో సిద్ధంగా లేవని ఆయన హెచ్చరించారు.
ఉద్యోగ అవకాశాల్లో రాబోయే మార్పులు, సైబర్ (ఇంటర్నెట్) దాడులు మరియు మనుషులు ఏఐపై తీవ్రంగా ఆధారపడే పరిస్థితుల పట్ల ఆయన తీవ్ర ఆందోళన వ్యక్తం చేశారు.
రాయిటర్స్ వార్తా సంస్థకు ఇచ్చిన ఇంటర్వ్యూలో, ఏఐ తీసుకువచ్చే మార్పుల వేగానికి తగినట్లుగా ప్రభుత్వాల సన్నాహాలు లేవని గేట్స్ పేర్కొన్నట్లు నివేదికలు తెలుపుతున్నాయి. అదే సమయంలో వైద్యం, విద్య, వ్యవసాయం వంటి రంగాలలో ఏఐ అద్భుతమైన మార్పులు తీసుకురాగల సామర్థ్యాన్ని కూడా ఆయన గుర్తుచేశారు.
ఏఐ రేసులో అమెరికా, చైనాల మధ్య ఉన్న పోటీపై కూడా గేట్స్ స్పందించారు. రెండు దేశాల అగ్రగామి ఏఐ మోడళ్ల మధ్య ఉన్న తేడా ఏమీ అంత పెద్దగా లేదని ఆయన అన్నారు. దీనివల్ల ఈ పోటీ కేవలం టెక్నాలజీకే పరిమితం కాకుండా ఉద్యోగాలు, భద్రత, వ్యాపారం సహా పలు రంగాలపై ప్రభావం చూపుతుందని సదరు వార్త పేర్కొంది.
ఏఐ తీవ్రతను వివరిస్తూ.. సినిమాల్లో ఏలియన్లు భూమిపై దాడి చేసినప్పుడు అమెరికా, చైనా వంటి దేశాలు తమ విభేదాలను మరచి ఒకటవుతాయని, అదే రీతిలో ఏఐ విషయంలోనూ ప్రపంచ దేశాలు కొన్ని కీలక అంశాల్లో కలిసి పనిచేయాలని గేట్స్ సూచించారు. ఇదిలా ఉండగా, వచ్చే రెండేళ్లలో ఆరోగ్యం, విద్య, వ్యవసాయ రంగాల్లో ఏఐ వినియోగాన్ని పెంపొందించేందుకు గేట్స్ ఫౌండేషన్ కనీసం 100 కోట్ల అమెరికన్ డాలర్లను ఖర్చు చేయాలని ప్రణాళికలు రచిస్తోంది.
Leave a Reply