ఇంట్లో ఒంటరిగా ఉన్నప్పుడు గుండెపోటు రావడం అనేది ఎవరినైనా భయపెట్టే విషయం. సహాయం కోసం ఎవరూ లేని స్థితిలో ఆందోళన చెందడం సహజం. అయితే, అటువంటప్పుడు కంగారు పడకుండా సమయస్ఫూర్తితో వ్యవహరిస్తే మీ ప్రాణాలను కాపాడుకోవచ్చు. నిపుణులు సూచిస్తున్న కొన్ని ముఖ్యమైన జాగ్రత్తలు ఇక్కడ ఉన్నాయి:
- అత్యవసర సహాయం కోరండి: ఛాతీ నొప్పి, శ్వాస తీసుకోవడంలో ఇబ్బంది, విపరీతంగా చెమటలు పట్టడం వంటి లక్షణాలు కనిపిస్తే వెంటనే 108 లేదా అంబులెన్స్‌కు కాల్ చేయండి. పొరపాటున కూడా మీరే కారు లేదా బైక్ నడుపుతూ ఆసుపత్రికి వెళ్లడానికి ప్రయత్నించకండి. దారిలో స్పృహ తప్పితే అది ప్రాణాపాయానికి దారితీస్తుంది.
- ఆస్పిరిన్ (Aspirin) టాబ్లెట్ వేసుకోండి: మీకు ఆస్పిరిన్ అలర్జీ లేకపోతే, ఒక 325mg ఆస్పిరిన్ టాబ్లెట్‌ను చప్పరించి లేదా నమిలి మింగండి. మింగడం కంటే నమలడం వల్ల అది త్వరగా రక్తంలో కలిసి గుండెకు రక్తప్రసరణ మెరుగుపరుస్తుంది.
- ముందు తలుపు తెరిచి ఉంచండి: అంబులెన్స్ సిబ్బంది లేదా ఇరుగుపొరుగు వారు లోపలికి రావడానికి వీలుగా ఇంటి ప్రధాన తలుపును అన్‌లాక్ చేసి ఉంచండి. ఒకవేళ మీరు స్పృహ తప్పి పడిపోయినా వారు తలుపు పగలగొట్టాల్సిన అవసరం లేకుండా లోపలికి రాగలరు.
- విశ్రాంతి తీసుకోండి: కంగారుగా అటు ఇటు పరిగెత్తడం వల్ల గుండెపై ఒత్తిడి పెరుగుతుంది. కాబట్టి ప్రశాంతంగా ఒక చోట కూర్చోండి. కింద నేల మీద కూర్చోవడం సురక్షితం, దీనివల్ల ఒకవేళ స్పృహ తప్పినా కిందపడి దెబ్బలు తగలకుండా ఉంటాయి.
- ఆత్మీయులకు సమాచారం ఇవ్వండి: అంబులెన్స్‌కు కాల్ చేసిన తర్వాత వెంటనే దగ్గరి బంధువులకు లేదా స్నేహితులకు ఫోన్ చేయండి. వారు వచ్చేవరకు వారితో ఫోన్లో మాట్లాడుతూ ఉండటం వల్ల మీకు మానసిక ధైర్యం కలుగుతుంది.
- ‘కఫ్ సి.పి.ఆర్’ (Cough CPR) వద్దు: సోషల్ మీడియాలో వైరల్ అయ్యే ‘గట్టిగా దగ్గడం వల్ల గుండెపోటు తగ్గుతుంది’ అనే వార్తలో నిజం లేదని వైద్య నిపుణులు చెబుతున్నారు. ఇది మీ శక్తిని వృథా చేస్తుంది తప్ప గుండెపోటును ఆపదు. కాబట్టి ప్రశాంతంగా ఉండటానికే ప్రయత్నించండి.