రెస్టారెంట్లకు వెళ్లి మనకిష్టమైన ఫుడ్ ఆర్డర్ చేసుకుని తినడంలో ఉండే మజాయే వేరు. కానీ, మనం అడిగే చిన్న చిన్న మార్పులకే కొన్ని హోటళ్లు వేసే విచిత్రమైన బిల్లులు చూస్తే మాత్రం తిన్నదంతా అక్కడే కక్కేసేలా తలతిరిగిపోతుంది.
అచ్చం అలాంటి దిమ్మతిరిగే అనుభవమే శాన్ ఫ్రాన్సిస్కోలోని ఓ ప్రముఖ కేఫ్లో వాబ్మితా సింగ్ అనే ప్రముఖ సోషల్ మీడియా ఇన్ఫ్లుయెన్సర్కు ఎదురైంది. ఆమె తన సోషల్ మీడియా పేజీలో పంచుకున్న ఈ చేదు అనుభవం ఇప్పుడు నెటిజన్లలో తీవ్ర చర్చకు దారితీసింది.
శాన్ ఫ్రాన్సిస్కోలోని ఒక కేఫ్కు వెళ్లిన వాబ్మితా సింగ్, తన కోసం ఒక శాండ్విచ్ను ఆర్డర్ చేశారు. తనకు చీజ్ (Cheese) ఇష్టం లేకపోవడంతో, శాండ్విచ్లో చీజ్ వేయకుండా తీసేసి ఇవ్వాలని కేఫ్ సిబ్బందిని కోరారు.
సాధారణంగా ఏదైనా పదార్థాన్ని ఎక్స్ట్రాగా అడిగితే అదనపు ఛార్జీలు వేయడం సహజం. కానీ, శాండ్విచ్లో చీజ్ వద్దని తీసేయమన్నందుకే ప్రత్యేకంగా ఎక్స్ట్రా ఛార్జ్ వేసిన బిల్లును చూసి ఆమెకు ఫ్యూజులు ఎగిరిపోయాయి. ఒక పదార్థాన్ని వద్దంటే కూడా ఛార్జ్ చేస్తారా అనే షాక్తో, ఆ బిల్లును వీడియోలో చూపిస్తూ తీవ్ర అసహనం వ్యక్తం చేశారు.
ఈ వీడియో సోషల్ మీడియాలో పోస్ట్ చేసిన కొద్దిసేపట్లోనే విపరీతంగా వైరల్ అయింది. “మనం ఏదైనా ఎక్స్ట్రా అడిగితే డబ్బులు వసూలు చేయడంలో న్యాయం ఉంది.. కానీ వద్దని తీసేయమంటే ఎందుకయ్యా బిల్లు వేస్తారు?” అంటూ నెటిజన్లు ఆ కేఫ్ విచిత్ర నిబంధనలపై మండిపడుతున్నారు.
రెస్టారెంట్లు కస్టమర్లను ఎలాంటి విడ్డూరమైన కారణాలతో బిల్లులు వేసి నిలువునా దోచుకుంటున్నాయో చెప్పడానికి ఈ ఘటనే ప్రత్యక్ష ఉదాహరణ అంటూ అనేకమంది కామెంట్ల రూపంలో తమ అసహనాన్ని వ్యక్తం చేస్తున్నారు.
Leave a Reply