న్యూఢిల్లీ: మధ్యప్రాచ్యంలో ఉద్రిక్తతలు తారాస్థాయికి చేరిన తరుణంలో, ఓమన్ తీరం వద్ద 12 మంది భారతీయ సిబ్బంది ఉన్న ‘టోగో’ దేశ జెండాతో (Togo-flagged) ప్రయాణిస్తున్న కెమికల్ ట్యాంకర్పై ఇరాన్ కోస్ట్ గార్డ్ దళాలు కాల్పులు జరిపాయి. ఏప్రిల్ 25న జరిగిన ఈ ఘటనను భారత నౌకాయాన మంత్రిత్వ శాఖ ఈరోజు (ఏప్రిల్ 27, 2026) ధృవీకరించింది.
అసలేం జరిగిందంటే? ‘ఎమ్.టి. చిరోన్’ (MT Chiron) అనే పేరు గల ఈ కెమికల్ ట్యాంకర్ ఓమన్లోని షినాస్ పోర్ట్ (Shinas Port) పరిధిలో ఇతర నౌకలతో కలిసి ప్రయాణిస్తోంది. ఆ సమయంలో ఇరాన్ తీర రక్షణ దళాలు ఈ నౌకను అడ్డుకోవడానికి ప్రయత్నించాయి.
నౌకను వెంటనే నిలిపివేయాలని హెచ్చరిస్తూ ఇరాన్ దళాలు కాల్పులు జరిపాయి. దీనితో సముద్రం మధ్యలో ఒక్కసారిగా భయాందోళనలు నెలకొన్నాయి. అయితే, నౌకలో ఉన్న మొత్తం 12 మంది భారతీయ నావికులు సురక్షితంగా ఉన్నారని కేంద్ర నౌకాయాన మంత్రిత్వ శాఖ డైరెక్టర్ మన్దీప్ సింగ్ రాంధవా తెలిపారు.