ముంబై: ఆర్థిక రాజధాని ముంబై నుండి బయటకు వచ్చిన ఒక హృదయవిదారక ఘటన బంధుత్వాల పవిత్రతను మంటగలిపింది. 20 ఏళ్ల మూగ, చెవిటి యువతి సొంత తండ్రి చేతిలోనే అఘాయిత్యానికి గురైంది. ఈ విషయం తెలిసిన పోలీసులు, వైద్యులు సైతం దిగ్భ్రాంతికి గురయ్యారు.
కడుపునొప్పి వెనుక భయంకరమైన నిజం: ఆ యువతికి ఒక్కసారిగా తీవ్రమైన కడుపునొప్పి మొదలైంది. తను మాట్లాడలేని పరిస్థితిలో ఉండటంతో, తన కడుపులో ఏదో ‘పాకుతున్నట్లు’ (కీటకాలు తిరుగుతున్నట్లు) ఉందని సంజ్ఞల ద్వారా తన నాయనమ్మకు చెప్పింది. సాధారణ గ్యాస్ సమస్య లేదా ఇన్ఫెక్షన్ అని భావించిన కుటుంబ సభ్యులు, పరిస్థితి విషమించడంతో వెంటనే ఆమెను ఆసుపత్రికి తరలించారు.
వైద్య పరీక్షల్లో బయటపడిన సంచలన నిజం: ఆసుపత్రిలో వైద్యులు పరీక్షలు నిర్వహించగా, ఆ 20 ఏళ్ల మూగ యువతి ఐదు నెలల గర్భవతి అని తేలింది. విషయం చాలా తీవ్రమైనది కావడంతో, ఆసుపత్రి యాజమాన్యం వెంటనే పోలీసులకు సమాచారం అందించింది.
డీఎన్ఏ టెస్టుతో బయటపడ్డ దుర్మార్గుడు: బాధిత యువతి మాట్లాడలేని పరిస్థితిలో ఉండటంతో నిందితుడిని పట్టుకోవడం పోలీసులకు పెద్ద సవాలుగా మారింది. పోలీసులు అనుమానితులైన దాదాపు 17 మంది నుండి డీఎన్ఏ శాంపిల్స్ సేకరించారు. ఆ శాంపిల్స్ను కడుపులోని పిండంతో పోల్చి చూడగా వచ్చిన ఫలితం అందరినీ షాక్కు గురిచేసింది. ఆ దుర్మార్గానికి పాల్పడింది ఎవరో కాదు, ఆమె కన్న తండ్రేనని తేలింది. పోలీసులు వెంటనే నిందితుడైన తండ్రిని అరెస్టు చేసి, తదుపరి చట్టపరమైన చర్యలు తీసుకుంటున్నారు.