కదులుతున్న రైలులో మళ్లీ దారుణం..! “20 ఏళ్ల గర్భిణిపై లైంగిక దాడికి పాల్పడిన కామాంధుడు”.. దేశమంతా షాక్..!

ఢిల్లీ నుండి పశ్చిమ బెంగాల్ వైపు వెళ్తున్న మహానందా ఎక్స్‌ప్రెస్ రైలు దివ్యాంగుల బోగీలో 20 ఏళ్ల గర్భిణిపై లైంగిక దాడికి పాల్పడిన ఘటన తీవ్ర దిగ్భ్రాంతిని కలిగించింది.

జనసంచారం లేని ఆ బోగీలో ఈ దారుణ ఘటన జరిగింది. రైలు వెళ్తున్న సమయంలో ఆ మహిళ భయాందోళనలతో వేసిన కేకలు విన్న సమీప ప్రయాణికులు వెంటనే రైల్వే సిబ్బందికి సమాచారం అందించారు; దీంతో రైల్వే ప్రొటెక్షన్ ఫోర్స్ (RPF) సిబ్బంది అప్రమత్తమయ్యారు.

బాధితురాలు వెంటనే తన భర్తకు ఫోన్ చేసి జరిగిన దారుణాన్ని చెప్పి సహాయం కోరింది. రైలు అలీపూర్ ద్వార్ స్టేషన్‌కు చేరుకోగానే, అక్కడ వేచి ఉన్న ఆమె భర్త, పోలీసులు వేగంగా వెళ్లి ఆ మహిళను సురక్షితంగా కాపాడి వైద్య సహాయం అందించే ఏర్పాటు చేశారు. ఈ ఘటనకు సంబంధించి అస్సాం రాష్ట్రానికి చెందిన గౌతమ్ మహాతో అనే వ్యక్తిని పోలీసులు అరెస్టు చేశారు. బాధితురాలి ఫిర్యాదు మేరకు వెంటనే కేసు నమోదు చేసి విచారణ జరుపుతున్నట్లు తెలిపారు.

అరెస్టు చేసిన వ్యక్తిని కోర్టులో హాజరుపరిచిన పోలీసులు, తదుపరి విచారణ కోసం అతడిని 5 రోజుల పోలీస్ కస్టడీకి తీసుకున్నారు. తక్కువ మంది ప్రయాణించే బోగీల్లో మహిళల భద్రతను నిర్ధారించడంపై, భద్రతా నిబంధనలను మెరుగుపరచడంపై రైల్వే యంత్రాంగం తీవ్రంగా ఆలోచిస్తోంది. గర్భిణిపై జరిగిన ఈ అమానుష దారుణ ఘటన పశ్చిమ బెంగాల్ వ్యాప్తంగా తీవ్ర ఆగ్రహాన్ని, సంచలనాన్ని రేకెత్తించింది.