లక్నో: వేసవి తాపానికి తట్టుకోలేక, కరెంటు లేని కారణంతో ఇంటి బయట నిద్రించిన ఒక కుటుంబం దురదృష్టవశాత్తు ప్రాణాలు కోల్పోయింది. ఈ హృదయ విదారక ఘటన ఉత్తరప్రదేశ్లోని బారాబంకి జిల్లాలో జరిగింది.
ఫతేపూర్ పోలీస్ స్టేషన్ పరిధిలోని ఝాన్సా గ్రామంలో ఈ ప్రమాదం చోటుచేసుకుంది. రాత్రి వేళ కరెంటు లేకపోవడంతో, వేడిని తట్టుకోలేక 35 ఏళ్ల నీరజ్, తన భార్య ఆర్తి మరియు ముగ్గురు పిల్లలతో కలిసి ఇంటి బయట పడుకున్నారు. అర్ధరాత్రి దాటిన తర్వాత, అతివేగంగా వచ్చిన ఒక డంపర్ మొదట రోడ్డు పక్కన ఉన్న చెట్టును ఢీకొట్టి, అదుపు తప్పి నిద్రిస్తున్న కుటుంబంపైకి దూసుకెళ్లింది. ఈ ప్రమాదంలో ఒకే కుటుంబానికి చెందిన నలుగురు ప్రాణాలు కోల్పోయారు.
ప్రమాదం జరిగిన వెంటనే స్థానికులు అక్కడికి చేరుకున్నారు, కానీ అప్పటికే జరగాల్సిన నష్టం జరిగిపోయింది. నీరజ్ మరియు వారి కుమారుడు అనురాగ్ (13) అక్కడికక్కడే మరణించారు. కుమార్తెలు అంశిక (10), అన్షు (6)లను ఆసుపత్రికి తరలించగా, అప్పటికే వారు మృతి చెందినట్లు వైద్యులు ప్రకటించారు. నీరజ్ భార్య ఆర్తి పరిస్థితి విషమంగా ఉంది. మెరుగైన చికిత్స కోసం ఆమెను లక్నోలోని లోహియా ఆసుపత్రికి తరలించారు.
స్థానికుల కథనం ప్రకారం, నీరజ్ చాలా కష్టపడే వ్యక్తి. ట్రక్కును అద్దెకు తీసుకుని జీవనోపాధి సాగిస్తున్నాడు. పిల్లలకు మంచి భవిష్యత్తు ఇవ్వాలని రాత్రింబవళ్లు శ్రమించేవాడు, కానీ ఆ ఒక్క రాత్రి అన్నీ ముగిసిపోయాయి. ప్రమాదం జరిగిన తర్వాత డంపర్ డ్రైవర్ పరారీలో ఉన్నాడు. పోలీసులు డంపర్ను స్వాధీనం చేసుకుని, డ్రైవర్ కోసం గాలిస్తున్నారు.