రాజ్కోట్: గుజరాత్లోని మోర్బీ జిల్లా నుండి అత్యంత సిగ్గుచేటు, దిగ్భ్రాంతికరమైన సంఘటన ఒకటి వెలుగులోకి వచ్చింది. ఇంటి అద్దె చెల్లించలేదనే కారణంతో ఒక కసాయి భర్త.. తన భార్యను, మైనర్ కూతురిని ఇంటి యజమానికి అప్పగించాడు. ఆ నీచమైన చర్యలో సదరు ఇంటి యజమాని తన బంధువును కూడా భాగస్వామిని చేసి, ఇద్దరూ కలిసి భార్యాకూతుళ్లపై పలుమార్లు అత్యాచారానికి ఒడిగట్టారు.
బాధిత భార్య ఇచ్చిన ఫిర్యాదు మేరకు పోలీసులు కేసు నమోదు చేసి, నిందితుడైన భర్తను, ఇంటి యజమానిని అరెస్ట్ చేశారు.
టైమ్స్ ఆఫ్ ఇండియా (Times of India) నివేదిక ప్రకారం.. బాధితురాలు మే 1న మోర్బీ పోలీస్ స్టేషన్లో ఫిర్యాదు చేసింది. ఆ ఫిర్యాదులోని వివరాల ప్రకారం.. సుమారు ఆరు నెలల క్రితం ఈ కుటుంబం ఉపాధి నిమిత్తం మోర్బీ నగరానికి వచ్చింది. అక్కడ నెలకు రూ. 2,000 అద్దెతో ఒక ఇల్లు తీసుకున్నారు. అయితే, భర్తకు సరైన పని దొరక్కపోవడంతో తీవ్ర ఆర్థిక ఇబ్బందులు ఎదుర్కొన్నారు. ఈ క్రమంలోనే ఇంటి అద్దె చెల్లించలేకపోయారు.
అద్దె బకాయి ఉన్నందున, భర్త అంగీకారంతోనే ఇంటి యజమాని.. ఆ కుటుంబంలోని 13 ఏళ్ల 7 నెలల మైనర్ బాలికపై ఘాతుకానికి పాల్పడ్డాడు. నిందితుడైన యజమాని ఆ మహిళపై, ఆమె కూతురిపై కొన్నిసార్లు తన స్వంత ఇంట్లో, కొన్నిసార్లు వారు అద్దెకు ఉంటున్న ఇంట్లో మరియు టంకారా ప్రాంతంలో నిరంతరం అత్యాచారానికి పాల్పడినట్లు ఫిర్యాదులో పేర్కొన్నారు. ఈ ఘోరంలో ఇంటి యజమాని బంధువు కూడా పాలుపంచుకున్నాడు.
పోలీసులు మహిళ భర్త, ఇంటి యజమాని మరియు అతని బంధువుపై భారతీయ న్యాయ సంహిత (BNS) మరియు పోక్సో (POCSO) చట్టం కింద కేసు నమోదు చేశారు. పోలీసుల సమాచారం ప్రకారం.. నిందితుడైన ఇంటి యజమానిని గురువారం కోర్టులో ప్రవేశపెట్టగా, న్యాయస్థానం అతనికి ఒక రోజు పోలీసు రిమాండ్ విధించింది. రిమాండ్ గడువు ముగిసిన అనంతరం నిందితుడిని న్యాయవ్యవస్థ ఆధీనంలోకి తీసుకుని జైలుకు తరలించారు. అంతకుముందే బాధిత మహిళ భర్తను కూడా అరెస్ట్ చేసి జైలుకు పంపారు.
మోర్బీ సిటీ ‘ఎ’ డివిజన్ పోలీస్ ఇన్స్పెక్టర్ వై.బి. జడేజా మాట్లాడుతూ.. ఈ కేసులో పరారీలో ఉన్న నిందితుడి బంధువు మరియు ఇతర సహచరుల కోసం గాలింపు చర్యలు ముమ్మరం చేసినట్లు తెలిపారు. బాధితులకు, నిందితులకు వైద్య పరీక్షలు (Medical examination) పూర్తి చేసినట్లు పోలీసులు వెల్లడించారు.