“కలిసే నిద్రపోయాం.. తెల్లారేసరికి కనిపించలేదు!” ఇంటి మేడపై నిద్రిస్తున్న ఏడేళ్ల బాలిక అర్ధరాత్రి అదృశ్యం.. కన్నీరుమున్నీరవుతున్న తల్లిదండ్రులు.. విల్లుపురంలో కలకలం!

తమిళనాడులోని విల్లుపురం జిల్లా, సెంజి సమీపంలో ఏడేళ్ల బాలిక అర్ధరాత్రి అదృశ్యమైన ఘటన స్థానికంగా తీవ్ర ఆందోళనకు దారితీసింది. కొద్ది రోజుల క్రితమే ఎంతో ఆనందంగా పుట్టినరోజు జరుపుకున్న ఆ చిన్నారి ఇలా కనిపించకుండా పోవడంతో తల్లిదండ్రులు కన్నీరుమున్నీరవుతున్నారు.

ఎప్పటిలాగే ఆ బాలిక తన తల్లిదండ్రులతో కలిసి ఇంటి మేడపై నిద్రించేందుకు వెళ్లింది. అయితే, అర్ధరాత్రి సమయంలో నిద్రలేచి చూసిన తల్లిదండ్రులకు పక్కన చిన్నారి కనిపించలేదు. దీంతో ఒక్కసారిగా ఆందోళనకు గురైన వారు ఇంటి మేడతో పాటు చుట్టుపక్కల ప్రాంతాల్లో వెతికారు. అయినప్పటికీ బాలిక ఆచూకీ లభించకపోవడంతో వెంటనే సమీప పోలీస్‌ స్టేషన్‌లో ఫిర్యాదు చేశారు.

ఫిర్యాదు అందుకున్న పోలీసులు వెంటనే గాలింపు చర్యలు ప్రారంభించారు. చిన్నారి ఆచూకీ కోసం పోలీసు జాగిలాలను రంగంలోకి దించి, ఆధారాలు సేకరించే ప్రయత్నం చేస్తున్నారు. అలాగే డ్రోన్‌ కెమెరాల సహాయంతో చుట్టుపక్కల అటవీ ప్రాంతాలు, ఎత్తుపల్లాలు ఉన్న ప్రదేశాల్లోనూ విస్తృతంగా గాలిస్తున్నారు.

కొద్ది రోజుల క్రితమే పుట్టినరోజు జరుపుకున్న చిన్నారి ఒక్కసారిగా అదృశ్యం కావడంతో కుటుంబ సభ్యులు తీవ్ర విషాదంలో మునిగిపోయారు. అసలు బాలిక ఎక్కడికి వెళ్లింది? ఏం జరిగింది? అనే ప్రశ్నలు స్థానికంగా ఆందోళన కలిగిస్తున్నాయి. ప్రస్తుతం పోలీసులు చిన్నారి ఆచూకీ కోసం గాలింపు కొనసాగిస్తున్నారు.