“కాపాడటానికి వచ్చినవారినే హడలెత్తించిన ఘటన..!” వాటర్ ట్యాంక్ పైకెక్కి 30 నిమిషాలు నిల్చున్న యువకుడు.. నచ్చజెబుతుండగానే ఊహించని ఘోరం..!

ఒడిశా రాష్ట్రం కటక్‌లోని ఎస్‌సీబీ మెడికల్ కాలేజీ అండ్ హాస్పిటల్ ప్రాంగణంలో ఓ యువకుడు వాటర్ ట్యాంక్ ఎక్కడంతో తీవ్ర కలకలం రేగింది.

మానసిక చికిత్స కోసం ఆసుపత్రికి వచ్చిన రాజేష్ పరిదా అనే యువకుడు, మానసిక వైద్య విభాగానికి సమీపంలో ఉన్న నీళ్ల ట్యాంకు పైకి ఎక్కాడు. దాదాపు 30 నిమిషాలకు పైగా అతను కిందకు దిగకుండా అక్కడే నిలబడటంతో ఆసుపత్రి ప్రాంగణంలో తీవ్ర ఉద్రిక్తత నెలకొంది. సమాచారం అందుకున్న వెంటనే పోలీసులు, అగ్నిమాపక సిబ్బంది ఘటనా స్థలానికి చేరుకున్నారు.

వాటర్ ట్యాంకుపై ఉన్న యువకుడితో పోలీసులు, రెస్క్యూ సిబ్బంది నిరంతరం మాట్లాడుతూ అతడిని సురక్షితంగా కిందకు దించేందుకు ప్రయత్నించారు. అయితే, రెస్క్యూ చర్యలు పూర్తయ్యేలోపే రాజేష్ ఒక్కసారిగా పైనుంచి కింద పడిపోయాడు. ఈ ప్రమాదంలో అతని తల, చేతులు, కాళ్లు, ఛాతీ భాగాల్లో తీవ్ర గాయాలయ్యాయి. వెంటనే అతడిని అత్యవసర చికిత్సా విభాగానికి (ICU) తరలించారు.

రాజేష్ పరిదా జాజ్‌పూర్ టౌన్‌కు చెందిన వ్యక్తిగా గుర్తించారు. మానసిక ఆరోగ్య సమస్యలతో బాధపడుతున్న అతడికి చికిత్స అందించేందుకు కుటుంబ సభ్యులు ఆసుపత్రికి తీసుకువచ్చారు. దీనికి ముందు రోజు కూడా అతను ఇంటి మేడపై నుంచి కిందకు దూకేందుకు ప్రయత్నించినట్లు కుటుంబ సభ్యులు తెలిపారు. ఆసుపత్రి ఓపీడీ విభాగంలో వైద్యుడికి చూపించేందుకు వేచి ఉన్న సమయంలో, కుటుంబ సభ్యుల కళ్లుగప్పి వెళ్లి అతడు వాటర్ ట్యాంకు ఎక్కినట్లు తెలిసింది.

ప్రస్తుతం ఆసుపత్రిలో రాజేష్‌కు వైద్యులు చికిత్స అందిస్తున్నారు. అతని పరిస్థితి విషమంగా ఉన్నట్లు సమాచారం. ఈ ఘటనపై పోలీసులు విచారణ ప్రారంభించారు. ఆసుపత్రి ఆవరణలో తీవ్ర అలజడి సృష్టించిన ఈ ఘటన.. మానసిక సమస్యలతో బాధపడేవారిని ఇలాంటి సమయాల్లో ఏమాత్రం ఒంటరిగా వదిలిపెట్టకుండా కుటుంబ సభ్యులు, ఆసుపత్రి సిబ్బంది నిరంతరం కనిపెట్టుకుని ఉండాల్సిన అవసరాన్ని గుర్తుచేస్తోంది.