బదాయూ (ఉత్తరప్రదేశ్): ఉత్తరప్రదేశ్‌లోని బదాయూ జిల్లా నుండి ఒక వింతైన వార్త వెలుగులోకి వచ్చింది. ఇక్కడ పిచ్చి కుక్క కరిచి మరణించిన ఒక గేదె ఇప్పుడు ఊరంతటికీ కంటిమీద కునుకు లేకుండా చేస్తోంది. ఒక అంత్యక్రియల విందులో (తేరహ్వి) వడ్డించిన రైతా (పెరుగు పచ్చడి) వల్ల రేబిస్ వ్యాపిస్తుందన్న భయం ఎంతలా పెరిగిపోయిందంటే.. డజన్ల కొద్దీ కాదు, ఏకంగా వందలాది మంది గ్రామస్థులు ఆసుపత్రికి పరుగులు తీసి ఇంజెక్షన్లు వేయించుకుంటున్నారు.
అసలేం జరిగిందంటే? బదాయూ జిల్లా ఉఝాని కొత్వాలి పరిధిలోని పిప్రోల్ గ్రామంలో ఈ ఘటన జరిగింది. గ్రామంలో జరిగిన ఒక అంత్యక్రియల విందులో భాగంగా అతిథులకు రైతా వడ్డించారు. ఈ రైతాను అదే గ్రామానికి చెందిన ప్రమోద్ సాహు అనే వ్యక్తికి చెందిన గేదె పాలతో చేసిన మజ్జిగతో తయారు చేశారు.
అయితే, కొన్ని రోజుల క్రితం ప్రమోద్‌కు చెందిన ఆ గేదెను ఒక పిచ్చి కుక్క కరిచిందని గ్రామస్థులు తెలిపారు. ఆ తర్వాత గేదెలో రేబిస్ లక్షణాలు కనిపించి అది మరణించింది.
ఆసుపత్రికి క్యూ కట్టిన 200 మందికి పైగా గ్రామస్థులు: గేదె మరణించిన తర్వాత, ఆ గేదె మజ్జిగతో చేసిన రైతా తిన్న వారికి కూడా రేబిస్ సోకుతుందనే వార్త ఊరంతా దావానలంలా వ్యాపించింది. ఈ భయంతో ప్రజలు ఇళ్లను వదిలి ఆసుపత్రుల బాట పట్టారు. ఒకరిద్దరు కాదు, ఏకంగా 200 మందికి పైగా గ్రామస్థులు ఆసుపత్రికి చేరుకుని, ముందుజాగ్రత్తగా యాంటీ రేబిస్ వ్యాక్సిన్ (Anti-Rabies Vaccine) వేయించుకుంటున్నారు.
వైద్యాధికారుల స్పందన: పెద్ద సంఖ్యలో ప్రజలు ఒక్కసారిగా ఆసుపత్రికి రావడంతో ఆరోగ్య శాఖ అప్రమత్తమైంది. దీనిపై జిల్లా ముఖ్య వైద్యాధికారి (CMO) స్పందిస్తూ.. రేబిస్‌తో గేదె మరణించిన సమాచారం తమకు అందిందని తెలిపారు. రైతా తిన్న వారందరూ ముందుజాగ్రత్తగా వ్యాక్సిన్ వేయించుకోవాలని సూచించినట్లు చెప్పారు.
రేబిస్ సోకిన తర్వాత చికిత్స చేయడం చాలా కష్టమని, అందుకే అనుమానం ఉన్నవారు వ్యాక్సిన్ తీసుకోవడం అవసరమని ఆయన పేర్కొన్నారు. అయితే, పాలను బాగా మరిగిస్తే రేబిస్ వైరస్ ముప్పు చాలా వరకు తగ్గిపోతుందని లేదా నశిస్తుందని, కాబట్టి ప్రజలు మరీ ఆందోళన చెందాల్సిన అవసరం లేదని ఆరోగ్య శాఖ వెల్లడించింది.