జార్ఖండ్ మాజీ ముఖ్యమంత్రి చంపై సోరెన్ మనవడు వీర్ సోరెన్ హిమాచల్ ప్రదేశ్‌లోని కులులో అనుమానాస్పద స్థితిలో మరణించారు. ఈ వార్త తెలిసిన వెంటనే మాజీ సీఎం చంపై సోరెన్, ఆయన కుమారుడు బాబూలాల్ సోరెన్‌తో సహా కుటుంబ సభ్యులు షిమ్లాకు బయలుదేరారు.
వీర్ సోరెన్ మరణానికి గల కారణాలు ఇంకా స్పష్టంగా తెలియలేదు. స్థానిక పోలీసులు మృతదేహాన్ని స్వాధీనం చేసుకున్నారు. సమాచారం ప్రకారం, వీర్ సోరెన్ తన స్నేహితులతో కలిసి కులు-మనాలీ పర్యటనకు వెళ్లారు. అక్కడ స్నేహితులతో కలిసి మంచుపై స్కేటింగ్ చేసిన తర్వాత హోటల్‌కు చేరుకున్నారు. అక్కడ అతని ఆరోగ్యం క్షీణించి మరణించారు.
తలనొప్పి రావడంతో మందు తీసుకున్నాడు: మీడియా నివేదికల ప్రకారం, సోమవారం వీర్ తన స్నేహితులతో కలిసి సోలాంగ్ నాలా, హమ్తా స్నో పాయింట్లను సందర్శించి తిరిగి హోమ్ స్టేకి వచ్చారు. మంగళవారం ఉదయం స్నేహితులు బయటకు వెళ్లగా, వీర్ అక్కడే ఉన్నారు. స్నేహితులు తిరిగి వచ్చాక, తనకు తీవ్రమైన తలనొప్పిగా ఉందని వీర్ చెప్పారు. వారు మందు ఇవ్వగా, అది వేసుకుని పడుకున్నారు. మధ్యాహ్నం 2:30 గంటల సమయంలో వీర్ బెడ్ పైనుండి కింద పడిపోవడంతో స్నేహితులు గమనించి ఆసుపత్రికి తరలించారు. మార్గమధ్యంలో అతని నోటి నుండి నురుగు వచ్చింది. ఆసుపత్రిలో సిపిఆర్ (CPR) చేసినప్పటికీ, అప్పటికే అతను మరణించినట్లు వైద్యులు ప్రకటించారు.
ఆసుపత్రికి చేరకముందే మృతి: మనాలీ డీఎస్పీ కేడీ శర్మ తెలిపిన వివరాల ప్రకారం.. మృతదేహంపై ఎటువంటి బాహ్య గాయాలు లేవు. పోస్ట్‌మార్టం నివేదిక వచ్చిన తర్వాతే మరణానికి అసలు కారణం తెలుస్తుందని పోలీసులు తెలిపారు.