తల్లిదండ్రులు తమ కూతుళ్లపై ఉన్న ప్రేమ, ఆందోళనతో కొన్నిసార్లు చిన్న విషయాలను కూడా అపార్థం చేసుకుంటారు. తమ కూతురు తప్పుడు మార్గంలో వెళ్తుందేమోనని భయపడతారు. అయితే, గైనకాలజిస్ట్ డాక్టర్ షెఫాలీ దధీచి వద్దకు వచ్చిన ఒక కేసులో ఇలాంటి ఆసక్తికరమైన సంఘటన జరిగింది. తన కూతురి హాస్టల్ బ్యాగ్లో దొరికిన ఒక వస్తువును చూసి ఆ తల్లి, తన కూతురు ‘చెడిపోయింది’ అని డాక్టర్తో వాపోయింది. కానీ, అది నిజానికి ఒక సురక్షితమైన ‘మెన్స్ట్రువల్ కప్’ అని డాక్టర్ వివరించారు.
అసలేం జరిగింది? డాక్టర్ షెఫాలీ దధీచి తన ఇన్స్టాగ్రామ్లో పంచుకున్న వీడియో ప్రకారం, ఒక తల్లి తన కూతురి బ్యాగ్ నుండి ఆ వస్తువును తీసి “ఇదంతా ఏమిటి? కాలేజీలో ఏం చేస్తున్నావు?” అని ఆవేదన వ్యక్తం చేసింది. కూతురు చెడిపోయిందని ఆమె ఆందోళన చెందింది.
ఎక్స్పర్ట్ వివరణ: దీనిని చూసిన డాక్టర్, అది మెన్స్ట్రువల్ కప్ (Menstrual Cup) అని తల్లికి అర్థమయ్యేలా వివరించారు.
- ఇది ఏంటి?: ఇది సిలికాన్ లేదా రబ్బరుతో తయారైన ఒక హైజీన్ ప్రొడక్ట్. పీరియడ్స్ సమయంలో దీనిని వెజైనాలో ఇన్సర్ట్ చేస్తారు.
- ఉపయోగాలు: దీనిని 10 నుండి 12 గంటల వరకు వాడవచ్చు. ఇది చాలా సౌకర్యవంతంగా ఉంటుంది, దీని వల్ల పీరియడ్స్ సమయంలో కూడా అమ్మాయిలు స్విమ్మింగ్, ఆటలు వంటివి సులభంగా చేయవచ్చు.
- ఇతర లాభాలు: ప్యాడ్స్లా కాకుండా ఇది వాడటం వల్ల రాషెస్ (Rashes) రావు, పదేపదే ప్యాడ్స్ మార్చాల్సిన పని లేదు, దుర్వాసన రాదు, ఇన్ఫెక్షన్ల ప్రమాదం తక్కువ.
ప్యాడ్స్ అవసరం లేదా? మెన్స్ట్రువల్ కప్ సరిగ్గా సెట్ అయితే, ప్యాడ్స్ వాడాల్సిన అవసరం లేదని డాక్టర్ చెప్పారు. దీనివల్ల బట్టలపై మరకలు పడతాయనే భయం, ప్యాడ్స్ మార్చేటప్పుడు ఉండే ఇబ్బందులు ఉండవు.
ధర గురించి: అది ఖరీదైనదని తల్లి అనగా, డాక్టర్ మాట్లాడుతూ.. “ఇది ఒకసారి కొంటే చాలా కాలం పాటు వస్తుంది, కాబట్టి ఇది అంత ఖరీదైనది కాదు” అని వివరించారు. ఎవరికి ఏది సౌకర్యంగా ఉంటే (ప్యాడ్స్ లేదా మెన్స్ట్రువల్ కప్) దానిని ఎంచుకోవచ్చని ఆమె సూచించారు.