దేశంలో సైబర్ మోసాలు రోజురోజుకూ పెరిగిపోతున్నాయి. ఇప్పుడు సైబర్ దొంగలు ఫేక్ లింకులు లేదా నకిలీ యాప్‌ల ద్వారా కాకుండా, మీ మొబైల్‌లోని ఒక సాధారణ ఫీచర్‌ను ఉపయోగించి మోసం చేస్తున్నారు. దీనినే ‘కాల్ ఫార్వర్డింగ్ స్కామ్’ అని పిలుస్తున్నారు. దీనివల్ల మీ బ్యాంక్ ఖాతాల నుండి సోషల్ మీడియా అకౌంట్ల వరకు అన్నీ ప్రమాదంలో పడే అవకాశం ఉంది.
ఈ తీవ్రమైన ముప్పు గురించి కేంద్ర హోం మంత్రిత్వ శాఖ పరిధిలోని ఇండియన్ సైబర్ క్రైమ్ కోఆర్డినేషన్ సెంటర్ (I4C) దేశవ్యాప్తంగా మొబైల్ వినియోగదారులకు కీలక హెచ్చరిక జారీ చేసింది.
కాల్ ఫార్వర్డింగ్ స్కామ్ అంటే ఏమిటి?
కాల్ ఫార్వర్డింగ్ అనేది మొబైల్‌లో ఉండే ఒక సాధారణ సదుపాయం. దీని ద్వారా మనకు వచ్చే కాల్స్‌ను మరొక నంబర్‌కు మళ్లించవచ్చు. సైబర్ నేరగాళ్లు ఈ ఫీచర్‌ను అడ్డం పెట్టుకుని మీ కాల్స్‌ను మరియు ఓటీపీలను (OTP) తమ ఫోన్లకు మళ్లించుకుంటున్నారు.
ఈ మోసం ఎలా జరుగుతుంది?
- నకిలీ కాల్/SMS: నేరగాళ్లు మీకు ఫోన్ చేసి తాము కొరియర్ కంపెనీ, డెలివరీ ఏజెంట్ లేదా కస్టమర్ కేర్ ప్రతినిధులమని పరిచయం చేసుకుంటారు.
- సమస్య సృష్టి: మీ పేరు మీద ఒక పార్శిల్ వచ్చిందని, దాని డెలివరీలో సమస్య ఉందని లేదా మీ అకౌంట్ సమాచారం అప్‌డేట్ చేయాలని నమ్మిస్తారు.
- కోడ్ డయల్ చేయడం: ఆ సమస్యను పరిష్కరించడానికి ఒక USSD కోడ్ డయల్ చేయమని కోరుతారు. ఈ కోడ్లు సాధారణంగా *21*, *61* లేదా *67* వంటి నంబర్లతో మొదలవుతాయి.
- మోసం అమలు: మీరు ఆ కోడ్ డయల్ చేయగానే మీ ఫోన్‌లోని కాల్ ఫార్వర్డింగ్ యాక్టివేట్ అవుతుంది. అంటే బ్యాంక్ నుండి వచ్చే ఓటీపీలు, వెరిఫికేషన్ కాల్స్ అన్నీ నేరుగా నేరగాళ్ల ఫోన్‌కు వెళ్తాయి. ఆ తర్వాత మీ ఖాతా నుండి డబ్బును దొంగిలించడం లేదా మీ వాట్సాప్ వంటి అకౌంట్లను హ్యాక్ చేయడం వారికి సులభమవుతుంది.
ఎటువంటి లింక్ లేదు.. యాప్ లేదు.. అయినా ప్రమాదమే!
ఈ స్కామ్‌లో ప్రమాదకరమైన విషయం ఏమిటంటే, మీరు ఏ లింక్‌ను క్లిక్ చేయాల్సిన అవసరం లేదు. కేవలం ఒక కోడ్ డయల్ చేస్తే సరిపోతుంది. అందుకే అపరిచితులు చెప్పే ఏ కోడ్‌ను కూడా డయల్ చేయవద్దని I4C సూచించింది.
అనుమానం వస్తే వెంటనే ఏం చేయాలి?
మీ కాల్స్ ఎవరికైనా ఫార్వర్డ్ అవుతున్నాయని మీకు అనుమానం కలిగితే, వెంటనే మీ మొబైల్ నుండి ఈ క్రింది కోడ్‌ను డయల్ చేయండి:
##002#
ఈ కోడ్ డయల్ చేయడం వల్ల మీ ఫోన్‌లో యాక్టివేట్ అయి ఉన్న అన్ని రకాల కాల్ ఫార్వర్డింగ్ సెట్టింగ్‌లు రద్దు చేయబడతాయి. కాల్స్ మళ్లీ నేరుగా మీ ఫోన్‌కే వస్తాయి.