తిరువనంతపురం: అరేబియా తీరాన భానుడు భగభగలాడుతున్నాడు. కేరళ రాష్ట్రంలో ఎండల తీవ్రత మునుపెన్నడూ లేని విధంగా మనుషులను ఉక్కిరిబిక్కిరి చేస్తోంది. రాష్ట్రవ్యాప్తంగా ఎండల తీవ్రత పెరుగుతున్న నేపథ్యంలో కేంద్ర వాతావరణ శాఖ (IMD) అత్యంత కీలకమైన హెచ్చరికలు జారీ చేసింది. ఇడుక్కి, వయనాడ్ మినహా మిగిలిన 12 జిల్లాలకు ‘యెల్లో అలర్ట్’ ప్రకటించింది. ఏప్రిల్ 19 వరకు ఈ తీవ్రమైన ఉష్ణతరంగాలు కొనసాగుతాయని స్పష్టం చేసింది.
జిల్లాల వారీగా సెగలు ఇవే:
రాష్ట్రంలో అత్యంత వేడి ప్రాంతంగా పాలక్కాడ్ నిలుస్తోంది. ఇక్కడ గరిష్ట ఉష్ణోగ్రత 40°C మార్కును దాటే అవకాశం ఉందని అధికారులు అంచనా వేస్తున్నారు.
- కొల్లాం: 39°C వరకు పెరిగే ఛాన్స్.
- కొట్టాయం: 38°C వేడితో సెగలు పుట్టించనుంది.
- పతనంతిట్ట, అలప్పుజ, ఎర్నాకుళం, త్రిస్సూర్, మలప్పురం, కోజికోడ్, కన్నూర్, కాసరగోడ్: ఈ జిల్లాల్లో 37°C వరకు ఉష్ణోగ్రతలు నమోదవుతాయని అంచనా.
- తిరువనంతపురం: రాజధానిలో 36°C మేర ఎండలు కాయనున్నాయి.
చెమటలు పట్టించే ‘హ్యుమిడిటీ’.. పెరిగిన అసౌకర్యం!
కేవలం ఉష్ణోగ్రత పెరగడమే కాకుండా, గాలిలో తేమ శాతం (Humidity) అధికంగా ఉండటం వల్ల ప్రజలు తీవ్ర అసౌకర్యానికి లోనవుతున్నారు. ఉష్ణోగ్రత రీడింగ్ కంటే కూడా శరీరం అనుభవించే వేడి ఎక్కువగా ఉండే ‘డిస్కమ్ఫోర్ట్ ఇండెక్స్’ పెరగనుందని వాతావరణ నిపుణులు హెచ్చరిస్తున్నారు. కొండ ప్రాంతాలు మినహా రాష్ట్రమంతటా ఉక్కపోతతో జనం అల్లాడిపోవాల్సిందే.
అప్రమత్తంగా ఉండండి.. వాతావరణ శాఖ సూచనలు:
తీవ్రమైన ఎండల నేపథ్యంలో ప్రజలు తమ ఆరోగ్యాన్ని కాపాడుకోవడానికి ఈ క్రింది జాగ్రత్తలు తీసుకోవాలని సూచించారు:
- మధ్యాహ్న సమయం: ఉదయం 11 గంటల నుండి మధ్యాహ్నం 3 గంటల వరకు నేరుగా ఎండ తగలకుండా చూసుకోవాలి. అత్యవసరమైతే తప్ప బయటకు రావద్దు.
- నిర్జలీకరణం: డీహైడ్రేషన్ కాకుండా ఉండటానికి దాహం లేకపోయినా ధారళంగా నీరు తాగాలి.
- ఆరోగ్య పరీక్షలు: ఎండ దెబ్బ తగిలినట్లు అనిపిస్తే వెంటనే వైద్యులను సంప్రదించాలి.