ఉత్తరప్రదేశ్ రాష్ట్రం కాన్పూర్‌లో భార్యాభర్తల మధ్య జరిగిన చిన్నపాటి వివాదం ఒక నిండు ప్రాణాన్ని బలితీసుకున్న ఘటన తీవ్ర దిగ్భ్రాంతిని కలిగిస్తోంది.
వివరాలు: సంఘటన జరిగిన రోజున భర్త కూరగాయలు కొనడానికి బయటకు వెళ్లి, కేవలం 10 నిమిషాల తర్వాత తిరిగి ఇంటికి వచ్చాడు. అప్పటికే ఇంటి తలుపు లోపల నుండి గడియ పెట్టి ఉంది. అతను ఎంతసేపు తలుపు తట్టినా, సెల్‌ఫోన్‌కు కాల్ చేసినా భార్య తలుపు తీయలేదు. దీంతో ఆందోళన చెందిన అతను, తన భార్యకు ఏదో ప్రమాదం జరిగిందని భావించి వెంటనే పోలీసులకు సమాచారం అందించాడు.
పోలీసులు హుటాహుటిన అక్కడికి చేరుకుని తలుపులు పగులగొట్టి లోపలికి వెళ్లగా, ఆ మహిళ ఫ్యాన్‌కు ఉరివేసుకుని కనిపించింది. వెంటనే ఆమెను ఆస్పత్రికి తరలించినప్పటికీ, ఆమె అప్పటికే మృతి చెందినట్లు వైద్యులు ధృవీకరించారు.
“నేను కేవలం కూరగాయలు తీసుకురావడానికి వెళ్లాను, ఇంతలోనే ఇలా జరుగుతుందని ఊహించలేదు” అని ఆ భర్త కన్నీరుమున్నీరుగా పోలీసులకు తెలిపాడు. అతి చిన్న కారణాలకే ఆత్మహత్య వంటి కఠిన నిర్ణయాలు తీసుకోవడం ఆ ప్రాంతంలో తీవ్ర విషాదాన్ని నింపింది. పోలీసులు కేసు నమోదు చేసి దర్యాప్తు చేస్తున్నారు.