ముంబై: శనివారం, జనవరి 31, 2026 మహారాష్ట్ర రాజకీయాల్లో ఒక చారిత్రాత్మక దినం. మహారాష్ట్ర తొలి మహిళా ఉప ముఖ్యమంత్రిగా సునేత్రా పవార్ నేడు ప్రమాణ స్వీకారం చేశారు. అజిత్ పవార్ ఆకస్మిక మరణం తర్వాత ఈ పదవీ బాధ్యతలు ఆమెకు దక్కాయి. రాజ్‌భవన్‌లో ఒకవైపు ఆమె ప్రమాణ స్వీకారం జరుగుతుంటే, మరోవైపు అజిత్ పవార్ జ్ఞాపకాలతో పవార్ కుటుంబం శోకసంద్రంలో మునిగిపోయింది. ఈ సందర్భంలో ఆమె మేనల్లుడు, ఎన్సీపీ ఎమ్మెల్యే రోహిత్ పవార్ సోషల్ మీడియాలో ఒక భావోద్వేగ సందేశాన్ని పంచుకున్నారు.
‘అజిత్ దాదా లోటును ఎవరూ పూడ్చలేరు’: రోహిత్ పవార్ ఎక్స్‌ (X) వేదికగా స్పందిస్తూ.. “రాష్ట్ర తొలి మహిళా ఉప ముఖ్యమంత్రిగా సునేత్రాబాయి ప్రమాణ స్వీకారం చేయడం ఎంతో సంతోషకరమైన విషయం. కానీ, అజిత్ దాదా స్థానాన్ని ఎవరూ భర్తీ చేయలేరన్నది చేదు నిజం. కనీసం సునేత్రాబాయి రూపంలోనైనా మనం అజిత్ దాదా ఉనికిని చూసుకోగలమని ఆశిస్తున్నాను” అని రాశారు.
అభినందనలు ఎలా చెప్పాలో తెలియడం లేదు: కుటుంబంలో నెలకొన్న మానసిక సంఘర్షణను రోహిత్ బయటపెట్టారు. “మేము ఇంకా కొండంత దుఃఖంలోనే ఉన్నాం. ఇలాంటి శోకసమయంలో ఆమెకు అభినందనలు ఎలా చెప్పాలో కూడా నాకు అర్థం కావడం లేదు” అని తన సందిగ్ధతను వ్యక్తం చేశారు.