చేతినిండా ఆస్తులు, రెండు అంతస్తుల విలాసవంతమైన ఇల్లు ఉన్నప్పటికీ, ఆ 84 ఏళ్ల వృద్ధుడి రాత్రులు మాత్రం ఒంటరితనం చీకట్లోనే గడుస్తున్నాయి.
మధ్యప్రదేశ్ రాష్ట్రంలోని విదిశా ప్రాంతం నుంచి తన మనవరాలితో కలిసి లక్నో నగరానికి వచ్చిన ఈ వృద్ధుడు, భార్య మరణం తర్వాత అనుభవిస్తున్న తీవ్రమైన ఏకాంతాన్ని పోగొట్టుకునేందుకు ఒక వినూత్న సదస్సులో పాల్గొన్నారు.
లక్నో నగరంలో ఇటీవల ‘సీనియర్ సిటిజన్స్ పరిచయ వేదిక’ పేరుతో ఒక సదస్సు నిర్వహించారు. 50 నుంచి 90 ఏళ్ల మధ్య వయసున్న దాదాపు 75 మంది పురుషులు, 15 మంది మహిళలు మాత్రమే ఈ కార్యక్రమానికి హాజరయ్యారు. వీరిలో అత్యధికులు భార్యను లేదా భర్తను కోల్పోయినవారు, విడాకులు తీసుకున్నవారు లేదా అవివాహిత వృద్ధులు. వారంతా ఒకరినొకరు కలుసుకుని తమ జీవిత అనుభవాలను, ఆవేదనను పంచుకున్నారు.
ఢిల్లీకి చెందిన 55 ఏళ్ల మహిళ తన బాధను వ్యక్తం చేస్తూ.. “నా భర్త చనిపోయి 30 ఏళ్లు దాటింది. నా కుమారులు ప్రయోజకులై వేర్వేరు నగరాల్లో స్థిరపడ్డారు. సాయంత్రం అయ్యేసరికి ఇంట్లో అలుముకునే నిశ్శబ్దం నన్ను వెంటాడుతోంది. జీవిత చరమాంకంలో కాసేపు కూర్చుని మాట్లాడేందుకు ఒక తోడు ఉంటే ఎంత బాగుంటుందో అనిపిస్తుంటుంది” అని ఆవేదన చెందారు.
అలాగే, ఒక మాజీ పోలీస్ అధికారి తన జీవితమంతా తల్లిదండ్రుల సేవకే అంకితం చేసి, కుటుంబ బాధ్యతల్లో మునిగిపోయి నేడు వృద్ధాప్యంలో ఒంటరిగా మిగిలిపోయిన వైనాన్ని కన్నీటితో వివరించారు. ప్రయాగ్‌రాజ్‌కు చెందిన మరో మహిళ మాట్లాడుతూ.. “వృద్ధాప్యంలో తోడు ఎంతో అవసరం; కానీ సమాజపు కట్టుబాట్లు, పాత ఆలోచనలే మహిళల స్వేచ్ఛకు సంకెళ్లు వేస్తున్నాయి” అని ఆందోళన వ్యక్తం చేశారు.
ఈ కార్యక్రమ నిర్వాహకులు మాట్లాడుతూ.. “పురుషులతో పోలిస్తే ఇలాంటి సమావేశాలకు మహిళల హాజరు చాలా తక్కువగా ఉంటోంది. సమాజపు అపోహలు, కుటుంబ ఒత్తిళ్లే వారిని ఇలాంటి వేదికలకు రాకుండా అడ్డుకుంటున్నాయి. ఒంటరితనంతో బాధపడే వృద్ధులకు తోడు అనేది కేవలం భావోద్వేగ అవసరం మాత్రమే కాదు, వారి ఆరోగ్యం, భద్రతకు కూడా ఎంతో ముఖ్యం” అని స్పష్టం చేశారు.
సదస్సులో పాల్గొన్న అనేకమంది వృద్ధులు ఒక చేదు నిజాన్ని అంగీకరించారు. చేతిలో కోట్లాది రూపాయల ఆస్తి ఉన్నా, చుట్టూ కుటుంబ సభ్యులు ఉన్నప్పటికీ తమని ఒంటరితనం లోలోపలే కుంగదీస్తోందని చెప్పారు. వారికి పెద్దపెద్ద విలాసాలు అవసరం లేదు; మనసు విప్పి మాట్లాడటానికి, కలిసి భోజనం చేయడానికి, జీవిత ప్రయాణపు చివరి క్షణాల్లో సాంత్వన చేకూర్చే ఒక మంచి స్నేహం మాత్రమే కావాలని కోరుకుంటున్నారు. ఈ సదస్సు ముగింపులో పలువురు వృద్ధులు తమ వివరాలు, ఫోన్ నంబర్లు పరస్పరం పంచుకుని సరికొత్త స్నేహాన్ని ప్రారంభించారు.