రాయ్‌పూర్: ఛత్తీస్‌గఢ్‌లోని జాంజ్‌గిర్-చాంపా జిల్లా నుండి ఒక దిగ్భ్రాంతికరమైన వార్త వెలుగులోకి వచ్చింది. తల్లి చేతుల్లో ఉన్న 20 రోజుల మగబిడ్డను ఒక కోతి లాక్కెళ్లి బావిలో పడేసింది. అయితే ఆ చిన్నారి అద్భుత రీతిలో ప్రాణాలతో బయటపడ్డాడు. ఆ సమయంలో బాబు ధరించి ఉన్న ‘డైపర్’ నీటిపై తేలడానికి సహాయపడటమే ఆ పసికందు ప్రాణాలు నిలవడానికి ప్రధాన కారణమైంది.
అసలేం జరిగింది?
సేవని గ్రామంలో ఒక మహిళ తన 20 రోజుల పసిబిడ్డను పట్టుకుని ఇంటి బయట నిలబడి ఉండగా, ఒక కోతి మెరుపు వేగంతో వచ్చి బాబును లాక్కుంది. బాబును పట్టుకుని ఇంటి పైకప్పు (టెర్రస్) మీదకు వెళ్లిన కోతిని చూసి గ్రామస్థులు భయాందోళనకు గురయ్యారు. కోతిని బెదిరించడానికి గ్రామస్థులు కేకలు వేస్తూ, పటాకులు కాల్చారు.
దీంతో భయపడిపోయిన ఆ కోతి, బాబును పక్కనే ఉన్న బావిలో పడేసి పారిపోయింది. వెంటనే అప్రమత్తమైన స్థానికులు బావిలోకి బకెట్‌ను దించి నిమిషాల వ్యవధిలోనే బాబును సురక్షితంగా బయటకు తీశారు.
డైపర్ ఎలా కాపాడింది?
సాధారణంగా పసిబిడ్డలు నీటిలో పడగానే మునిగిపోయే ప్రమాదం ఉంటుంది. కానీ ఈ బాబు ధరించిన డైపర్‌లో గాలి నిండి ఉండటం వల్ల అది ఒక లైఫ్ జాకెట్‌లా (Buoyancy) పనిచేసి బాబు నీటిపై తేలేలా చేసింది. దీనివల్ల బాబు నీళ్లలో మునిగిపోకుండా రక్షించబడ్డాడు. ప్రాథమిక చికిత్స అనంతరం బాబును జిల్లా ఆసుపత్రికి తరలించారు. ప్రస్తుతం బాబు ఆరోగ్యం నిలకడగా ఉందని వైద్యులు తెలిపారు.