జార్ఖండ్‌లోని గోడ్డా జిల్లాలో ఒక వింత మరియు బాధాకరమైన ఘటన వెలుగులోకి వచ్చింది. కేవలం మతం వేరనే కారణంతో ఒక కొడుకు తన కన్నతల్లిని ఇంట్లోకి రానివ్వనని తెగేసి చెప్పాడు. తల్లి సుశీల ముర్ము క్రైస్తవ మతాన్ని పాటిస్తుండటమే అందుకు కారణం. ఒకవేళ ఆమె కుటుంబంలోకి తిరిగి రావాలంటే హిందూ మతంలోకి మారాలని కొడుకు మదన్ బేస్రా షరతు పెట్టాడు. దీనికి సుశీల ముర్ము నిరాకరించారు.
25 ఏళ్ల నిరీక్షణ.. చివరకు విషాదం
కోల్‌కతాలోని ఒక షెల్టర్ హోమ్‌లో గత రెండు దశాబ్దాలుగా నివసిస్తున్న సుశీల ముర్ముకు ఎట్టకేలకు తన ఇంటి చిరునామా దొరికింది. కానీ, కుటుంబం కళ్లముందు ఉన్నా.. మతం అనేది గోడలా నిలిచింది.
- నేపథ్యం: సుశీల ముర్ము సుమారు 20 ఏళ్ల క్రితం తన భర్త మరణించిన తర్వాత తప్పిపోయారు. ఆమె భర్త హిందువు, కానీ సుశీల పెళ్లికి ముందే క్రైస్తవ మతాన్ని స్వీకరించారు. భర్త చనిపోయిన తర్వాత గ్రామంలోని కొందరు ఆమెను ఉండనివ్వకపోవడంతో ఇల్లు వదిలి వెళ్లాల్సి వచ్చింది.
జ్ఞాపకశక్తి కోల్పోయిన సుశీల
సుశీల కోల్‌కతాకు ఎలా చేరుకున్నారో కూడా ఆమెకు గుర్తులేదు. 2001లో ‘మిషనరీస్ ఆఫ్ ఛారిటీ’ సభ్యులు ఆమెను గుర్తించి షెల్టర్ హోమ్‌లో చేర్పించారు. అక్కడి సిబ్బంది మరియు రేడియో క్లబ్ సభ్యుడు అంబరీష్ నాగ్ బిస్వాస్ చేసిన కృషితో ఆమె ఫోటోను రేడియో నెట్‌వర్క్ ద్వారా పంపి జార్ఖండ్‌లోని దహుపాగర్ గ్రామంలో ఉన్న ఆమె కుటుంబాన్ని గుర్తించారు.
బంధం కంటే మతమే మిన్న?
దాదాపు 25 ఏళ్ల తర్వాత తల్లి, కొడుకు మధ్య వీడియో కాల్ ద్వారా మాటలు కలిశాయి. అయితే కొడుకు మదన్ బేస్రా మాత్రం.. “నువ్వు ఇంటికి రావాలంటే హిందూ మతం స్వీకరించాలి” అని కఠినంగా చెప్పాడు. దానికి సుశీల స్పందిస్తూ.. “నేను నా మతాన్ని వదులుకోలేను, ఇదే నా చివరి మాట” అని తేల్చి చెప్పారు.
పోలీసుల స్పందన: పొరియాహట్ స్టేషన్ ఇన్-ఛార్జ్ మహావీర్ పండిట్ మాట్లాడుతూ.. తానే స్వయంగా గ్రామానికి వెళ్లి కొడుకుతో మాట్లాడి పరిస్థితిని విచారిస్తానని తెలిపారు. ప్రస్తుతానికి సుశీల ముర్ము తిరిగి కోల్‌కతాలోని షెల్టర్ హోమ్‌లోనే ఉంటున్నారు.