బీహార్‌లోని నవాదా జిల్లాలో వెలుగులోకి వచ్చిన ఈ ఉదంతం వినడానికి వింతగా అనిపించినా, ఇది చాలా ప్రమాదకరమైన సైబర్ మోసం. నిస్సహాయతను, డబ్బుపై ఉన్న ఆశను పెట్టుబడిగా మార్చుకుని కేటుగాళ్లు చేస్తున్న ఈ కొత్త తరహా వంచన పోలీసులను సైతం విస్మయానికి గురిచేసింది.
మోసం ఎలా సాగుతుందంటే: సైబర్ నేరగాళ్లు “ఆల్ ఇండియా ప్రెగ్నెంట్ జాబ్ సర్వీస్” (All India Pregnant Job Service) పేరుతో ఒక నకిలీ నెట్‌వర్క్‌ను నడుపుతున్నారు. పిల్లలు లేని ధనిక మహిళలను గర్భవతిని చేయడానికి సహాయపడితే (Spanderm Donor/Physical contact), అందుకు ప్రతిఫలంగా రూ. 10 లక్షల వరకు సంపాదిస్తారని నిరుద్యోగులను, యువకులను ఆకర్షిస్తారు.
వల విసిరే విధానం:
- ముందుగా బాధితులకు ఫోన్ చేసి, తాము ఒక ఏజెన్సీ నుండి మాట్లాడుతున్నామని నమ్మిస్తారు.
- రిజిస్ట్రేషన్ ఫీజు పేరుతో కొంత మొత్తం వసూలు చేస్తారు.
- ఆ తర్వాత సెక్యూరిటీ డిపాజిట్, మెడికల్ టెస్ట్ అని రకరకాల కారణాలతో వేల నుండి లక్షల రూపాయలు గుంజుతారు.
- అంతేకాకుండా, పిల్లలు లేని మహిళలకు కూడా తమ దగ్గర ప్రత్యేక చికిత్సలు ఉన్నాయని నమ్మించి వారి నుండి కూడా డబ్బులు వసూలు చేస్తారు.
పోలీసుల దాడులు – అరెస్టులు: నవాదా ఎస్పీ అభినవ్ ధీమాన్ ఆదేశాల మేరకు పోలీసులు హిసువా పోలీస్ స్టేషన్ పరిధిలోని మన్వా గ్రామంలో ఒక ఇంటిపై దాడి చేశారు. ఈ దాడిలో రంజన్ కుమార్ అనే వ్యక్తితో పాటు ఒక మైనర్‌ను పోలీసులు రెడ్ హ్యాండెడ్‌గా పట్టుకున్నారు. నిందితుల వద్ద నుండి నాలుగు మొబైల్ ఫోన్లు స్వాధీనం చేసుకున్నారు. అందులో ఉన్న ఛాటింగ్స్, కాల్ రికార్డింగ్స్ చూసి పోలీసులు షాక్ అయ్యారు. ఇప్పటికే వీరు లక్షలాది రూపాయలు వసూలు చేసినట్లు విచారణలో తేలింది.
ముఖ్యమైన హెచ్చరిక: నిందితులపై ఐటీ చట్టం మరియు వివిధ సెక్షన్ల కింద కేసులు నమోదు చేశారు. సామాజిక విలువలతో ఆడుకుంటూ చేస్తున్న ఇటువంటి సైబర్ మోసాల పట్ల ప్రజలు అప్రమత్తంగా ఉండాలని పోలీసులు సూచిస్తున్నారు.