“పాలస్తీనా పిల్లలు పెరిగి పెద్దలవ్వకముందే యుద్ధం వల్ల చిధ్రమైపోతున్నారు” అని ప్రపంచ ప్రఖ్యాత యాక్షన్ నటుడు జాకీ చాన్ కన్నీటి పర్యంతమయ్యారు.
ఘటన నేపథ్యం:
జాకీ చాన్ (71) నటించిన ‘అన్ ఎక్స్‌పెక్టెడ్ ఫ్యామిలీ’ (Unexpected Family) అనే కొత్త సినిమా ప్రమోషన్ కార్యక్రమం చైనా రాజధాని బీజింగ్‌లో జరిగింది. ఈ సందర్భంగా గాజా యుద్ధం గురించి మాట్లాడుతూ.. ఒక బాలుడికి సంబంధించిన వీడియో చూసి తాను ఎంతగా కలత చెందారో వివరించారు.
జాకీ చాన్ మాటల్లో ఆ బాధ:
“ఇటీవల గాజా పిల్లల కష్టాలను చూపే ఒక వీడియో చూశాను. అందులో ఒక చిన్నారిని.. ‘నువ్వు పెద్దయ్యాక ఏమవుతావు?’ అని అడిగారు. దానికి ఆ అబ్బాయి ఏమాత్రం చలనం లేకుండా, చాలా సాదాసీదాగా.. ‘మా ఊరిలో పిల్లలు పెద్దవారు అవ్వరు; ఎందుకంటే మేము పెరగకముందే చంపబడతాము’ అని సమాధానం ఇచ్చాడు.
ఆ అబ్బాయి మాట్లాడుతుంటే నా కళ్లలో నీళ్లు ఆగలేదు. మరణానికి అలవాటు పడిపోయిన ఆ పసి ముఖాన్ని చూస్తుంటే నాకు గుండె తర్వినట్లయింది. మనం ముసలితనాన్ని ఒక భారంగా భావిస్తాము. కానీ కోట్లాది మంది పిల్లలకు ఆ ముసలితనం వరకు బ్రతికే భాగ్యం కూడా కలగడం లేదు.” అని ఆవేదన వ్యక్తం చేశారు. హింస అనేది ఒక చిన్నారి జీవితంలో ఎంతగా కలిసిపోతే.. చావు గురించి ఇంత సాధారణంగా మాట్లాడగలుగుతారో ప్రపంచం ఆలోచించాలని ఆయన కోరారు.
గాజా యుద్ధం – భీకర గణాంకాలు:
గత రెండేళ్లుగా సాగుతున్న ఈ యుద్ధంలో ఇప్పటివరకు 71,000 మందికి పైగా పాలస్తీనీయులు ప్రాణాలు కోల్పోయారు. ఇందులో అత్యంత దారుణమైన విషయం ఏమిటంటే.. మరణించిన వారిలో మెజారిటీ మహిళలు మరియు పిల్లలే.
- పిల్లల మరణాలు: అధికారిక లెక్కల ప్రకారం ఇప్పటివరకు 20,000 మంది పిల్లలు యుద్ధానికి బలియ్యారు.
- సగటు: గత 23 నెలల్లో గాజాలో సగటున గంటకు ఒక బిడ్డ చొప్పున ప్రాణాలు కోల్పోవడం ప్రపంచ దేశాలను దిగ్భ్రాంతికి గురిచేస్తోంది.