గుండెపోటు ప్రాణాలను తీయగలదు. అందుకే ఈ ముప్పును తగ్గించుకోవాలంటే శరీరం ఇచ్చే సంకేతాల పట్ల అప్రమత్తంగా ఉండాలి. గుండె కండరాలకు రక్తాన్ని సరఫరా చేసే ధమనులలో అడ్డంకులు ఏర్పడి, ఆక్సిజన్ సరఫరా నిలిచిపోయినప్పుడు గుండెపోటు వస్తుంది.
గత కొంతకాలంగా గుండెపోటు కేసులు బాగా పెరుగుతున్నాయి. అయితే, గుండెపోటు రావడానికి కొన్ని గంటల ముందే మన శరీరం కొన్ని ముఖ్యమైన సంకేతాలను ఇస్తుంది. వైద్యశాస్త్రంలో దీనిని ‘ప్రోడ్రోమల్ విండో’ (Prodromal Window) అని పిలుస్తారు. చాలామంది ఈ కాలాన్ని సాధారణ అలసట లేదా గ్యాస్ సమస్యగా భావించి నిర్లక్ష్యం చేస్తారు. ఈ దశలో గుండెకు రక్తప్రసరణ ప్రభావితమై ఒత్తిడి పెరుగుతుంది. ఈ సమయంలోనే డాక్టరును సంప్రదిస్తే ప్రాణాపాయం నుండి బయటపడవచ్చు.
ముఖ్యమైన లక్షణాలు:
- అసాధారణమైన మరియు నిరంతర అలసట: హఠాత్తుగా ఎటువంటి కారణం లేకుండా అలసటగా అనిపించడం గుండెపోటుకు ప్రాథమిక సంకేతం. కొద్ది దూరం నడిచినా లేదా చిన్న పని చేసినా విపరీతమైన నీరసం రావడం సాధారణం కాదు.
- ఛాతీలో ఒత్తిడి లేదా మంట: ఛాతీలో నొప్పి క్రమంగా పెరుగుతూ తీవ్రంగా మారుతుంది. కొన్నిసార్లు ఛాతీలో ఏదో బరువు పెట్టినట్లు, బిగుతుగా లేదా మంటగా అనిపిస్తుంది. విశ్రాంతి తీసుకుంటే ఇది తాత్కాలికంగా తగ్గుతుంది కాబట్టి, ప్రజలు దీనిని ఎసిడిటీ లేదా కండరాల నొప్పి అని పొరబడతారు.
- శ్వాస తీసుకోవడంలో ఇబ్బంది: విశ్రాంతి తీసుకుంటున్నప్పుడు కూడా ఆకస్మికంగా ఆయాసం రావడం ప్రమాదకరం. శరీరానికి సరిపడా ఆక్సిజన్ అందనప్పుడు గుండెపై ప్రభావం పడి ఈ సమస్య తలెత్తుతుంది.
- ఇతర శరీర భాగాలలో నొప్పి: నొప్పి కేవలం ఛాతీకే పరిమితం కాకుండా చేతులు, భుజాలు, మెడ, దవడ, వెన్ను పైభాగం లేదా పొట్ట పైభాగానికి పాకవచ్చు.
- మరికొన్ని లక్షణాలు: చల్లటి చెమటలు పట్టడం, తల తిరగడం, వికారం (Nausea) లేదా అకారణంగా ఆందోళన కలగడం వంటివి కూడా తీవ్రమైన సంకేతాలే.