గుండెలు ఆగిపోయే క్షణాలు.! “గాలిలో తలకిందులుగా వేలాడిన బస్సు”. లోయలో వెళ్తుండగా జరిగిన ఘోరం.. ఒక చెట్టు ఆపడంతో ప్రాణాలతో బయటపడిన 30 మంది ప్రయాణికులు.. వైరల్ అవుతున్న భయానక వీడియో.!

ఉత్తరాఖండ్ రాష్ట్రం పౌరీ గర్వాల్ జిల్లాలోని దుగడ్డా, గుమ్ఖాల్ మధ్య ఉన్న ఘాట్ రోడ్డులో సుమారు 30 మంది ప్రయాణికులతో వెళ్తున్న ఓ ప్రైవేట్ బస్సు ఊహించని విధంగా ప్రమాదానికి గురైంది.

‘గర్వాల్ మోటార్ ఓనర్స్ యూనియన్’ సంస్థకు చెందిన ఆ బస్సు పత్లిఖాల్ ప్రాంతం సమీపంలోని కಡಿದైన ఘాట్ రోడ్డులో వెళ్తుండగా ఈ ఘటన చోటుచేసుకుంది.

పౌరీ – కోట్‌ద్వార్ రహదారిలో ప్రయాణిస్తున్న సమయంలో, బస్సు ప్రెషర్ పైపులో అకస్మాత్తుగా ఏర్పడిన యాంత్రిక లోపం కారణంగా బస్సు ఎత్తైన ప్రాంతంలో పైకి వెళ్లలేక నిలిచిపోయింది. తర్వాతి కొన్ని సెకన్లలోనే అదుపు తప్పిన బస్సు వేగంగా వెనక్కి దొర్లుకుంటూ వెళ్లి, రోడ్డు పక్కనే ఉన్న లోతైన లోయలోకి జారిపోయింది.

బస్సు లోయలో పడి నుజ్జునుజ్జు అయ్యే తరుణంలో, అక్కడ వాలులో ఉన్న ఒక పెద్ద చెట్టు బస్సును అడ్డుకుని మరింత కిందకు పడిపోకుండా నిలువరించింది. ఆ చెట్టు బలమైన అడ్డంకిగా నిలవడంతో బస్సు లోయలో పడకుండా వేలాడుతూ నిలిచిపోయింది. దీంతో బస్సులో ఉన్న 30 మంది ప్రయాణికులు వెంటనే బస్సులోంచి బయటకు వచ్చి తృటిలో ప్రాణాపాయం నుంచి తప్పించుకున్నారు.

ఈ ప్రమాదంలో కొందరు ప్రయాణికులకు స్వల్ప గాయాలైనట్లు స్థానిక సమాచారం. ఘాట్ రోడ్లలో వాహనాలను సరైన కండిషన్‌లో ఉంచుకోవాల్సిన అవసరాన్ని ఈ ఘటన గుర్తుచేస్తోంది. ఈ ఘటనపై సంబంధిత ప్రభుత్వ మరియు పోలీసు అధికారులు విచారణ జరుపుతున్నారు.