న్యూఢిల్లీ: ఇరాన్ ప్రమేయం ఉన్న యుద్ధం కారణంగా అంతర్జాతీయంగా ముడిచమురు సరఫరా నిలిచిపోవడంతో భారత్‌లో వంటగ్యాస్ పంపిణీలో తీవ్ర సంక్షోభం నెలకొంది. భారతదేశ ఎల్పీజీ అవసరాలలో 60 శాతం దిగుమతులపైనే ఆధారపడి ఉన్నాయి. ఇందులో 90 శాతం హోర్ముజ్ జలసంధి ద్వారానే సరఫరా అవుతాయి.
దేశంలోని అనేక నగరాల్లో గ్యాస్ ఏజెన్సీల ముందు వినియోగదారులు క్యూ కడుతున్నారు. ఈ క్లిష్ట పరిస్థితుల్లో వినియోగదారులకు ఊరటనిచ్చేందుకు ప్రభుత్వ రంగ సంస్థ ఇండియన్ ఆయిల్ కార్పొరేషన్ రంగంలోకి దిగింది. సాధారణ గ్యాస్ సిలిండర్ల కోసం వేచి ఉండాల్సిన అవసరం లేకుండా, త్వరగా అందుబాటులోకి వచ్చే 5 కిలోల ‘ఛోటూ’ (Chhotu) సిలిండర్లను కంపెనీ ప్రమోట్ చేస్తోంది.
‘ఛోటూ’ ప్రత్యేకతలు ఇవే:
- బుకింగ్ అవసరం లేదు: ఛోటూ సిలిండర్ పొందడానికి ముందుగా బుక్ చేసుకోవాల్సిన అవసరం లేదు. నేరుగా సమీపంలోని ఇండేన్ (Indane) గ్యాస్ ఏజెన్సీకి వెళ్లి కొనుగోలు చేయవచ్చు.
- చిరునామా ధృవీకరణ అక్కర్లేదు: సాధారణ గ్యాస్ కనెక్షన్ కోసం కావాల్సిన అడ్రస్ ప్రూఫ్ దీనికి అవసరం లేదు. కేవలం ఏదైనా గుర్తింపు కార్డు (ID Proof) చూపిస్తే సరిపోతుంది.
- సులభంగా లభ్యత: ఇండేన్ పంపిణీదారుల వద్దే కాకుండా, గుర్తింపు పొందిన రిటైల్ అవుట్‌లెట్లు మరియు కిరాణా దుకాణాల్లో కూడా దీనిని రీఫిల్ చేసుకోవచ్చు. దీని కోసం నిరీక్షించాల్సిన పనిలేదు; సిలిండర్ ఇచ్చి వెంటనే నింపిన సిలిండర్ తీసుకోవచ్చు.
పరిమాణంలో చిన్నదైనప్పటికీ, వంటగ్యాస్ అత్యవసరంగా కావాల్సిన వారికి మరియు సరఫరాలో అంతరాయం ఎదుర్కొంటున్న వారికి ‘ఛోటూ’ ఒక గొప్ప వరమని ఇండియన్ ఆయిల్ కార్పొరేషన్ పేర్కొంది. అందరికీ ఎల్పీజీని సులభంగా చేరవేయాలనే లక్ష్యంతో ఈ పథకాన్ని విస్తరించినట్లు ఇండియన్ ఆయిల్ తన ఎక్స్ (X) ఖాతాలో వెల్లడించింది.