ప్రతాప్‌గఢ్:ఉత్తరప్రదేశ్‌లోని అమేథీ-ప్రతాప్‌గఢ్ హైవేపై ఆదివారం గుండెలవిసే ప్రమాదం జరిగింది. హైవే పక్కన ఉన్న ఒక పెట్రోల్ పంపు వద్ద 65 అడుగుల ఎత్తు ఉన్న హైమాస్ట్ లైట్ పోల్‌ను ఏర్పాటు చేస్తుండగా, అది అదుపుతప్పి రోడ్డుపై వెళ్తున్న క్రెటా కారుపై పడింది. ఈ ప్రమాదంలో సమాజ్‌వాదీ పార్టీ నాయకుడు లాల్ బహదూర్ యాదవ్ మరణించారు.
ప్రమాదం జరిగిన తీరు: బాబుగంజ్ బజార్ సమీపంలోని భారత్ పెట్రోలియం పంపు వద్ద క్రీన్‌ సహాయంతో సుమారు 65 అడుగుల ఎత్తైన భారీ పోల్‌ను నిలబెట్టే పని జరుగుతోంది. ప్రత్యక్ష సాక్షుల కథనం ప్రకారం.. స్తంభాన్ని పైకి లేపుతున్న సమయంలో క్రీన్‌కు ఉన్న బెల్ట్ ఒక్కసారిగా తెగిపోయింది. దీనితో సుమారు 40 క్వింటాళ్ల బరువున్న ఆ భారీ స్తంభం నేరుగా రోడ్డుపై వెళ్తున్న లాల్ బహదూర్ యాదవ్ కారుపై పడింది. ఆ బరువుకు కారు పూర్తిగా నజ్జునజ్జు అయిపోయింది, ఆయన లోపల తీవ్రంగా నలిగిపోయారు.
ఇంటికి 500 మీటర్ల దూరంలోనే.. ఈ ప్రమాదం మృతుడు లాల్ బహదూర్ యాదవ్ ఇంటికి కేవలం 500 మీటర్ల దూరంలోనే జరగడం గమనార్హం. ఆయన బాబుగంజ్ బజార్ నివాసి మరియు పీడబ్ల్యూడీ (PWD) కాంట్రాక్టరుగా పనిచేస్తున్నారు. సమాజ్‌వాదీ పార్టీలో క్రియాశీల కార్యకర్తగా ఆయనకు మంచి గుర్తింపు ఉంది.
ప్రజల ఆగ్రహం – పోలీసు విచారణ: నివాస ప్రాంతాలు మరియు నిరంతరం వాహనాలు తిరిగే రహదారి పక్కన ఇంత భారీ పని చేపట్టినప్పుడు కనీస భద్రతా ప్రమాణాలు పాటించలేదని స్థానికులు ఆగ్రహం వ్యక్తం చేస్తున్నారు. పోలీసులు కేసు నమోదు చేసి, ఈ నిర్లక్ష్యానికి కారణమైన వారిపై విచారణ ప్రారంభించారు.