ఫరూఖాబాద్: కారు పార్కింగ్ చేసే సమయంలో జరిగిన ఒక చిన్న పొరపాటు ఒక వృద్ధురాలి ప్రాణాలను బలితీసుకుంది. ఉత్తరప్రదేశ్‌లోని ఫరూఖాబాద్‌లో మహీంద్రా థార్ కారు కింద పడి 70 ఏళ్ల వృద్ధురాలు దుర్మరణం పాలైంది. తన మనవడే కారు నడుపుతుండటం, అతని కళ్ల ముందే ఈ దారుణం జరగడం స్థానికంగా అందరినీ కలిచివేసింది.
అసలేం జరిగింది?
ఈ ఘటన గురువారం రాత్రి 8:30 గంటల ప్రాంతంలో జరిగింది. సీసీటీవీ ఫుటేజీ ప్రకారం.. మనవడు తన థార్ కారును ఇంటి ఆవరణలో పార్క్ చేస్తుండగా, అతని బామ్మ సరళా కటారియా (70) కారు లోపలికి రావడానికి గేటు తీశారు. కారు లోపలికి వెళ్లాక ఆమె గేటు మూసి లాక్ వేస్తుండగా, ఒక్కసారిగా కారు వెనక్కి దూసుకువచ్చింది.
హ్యాండ్‌బ్రేక్ వేయకపోవడమే కారణం: కారును పార్కింగ్ చేసిన తర్వాత మనవడు హ్యాండ్‌బ్రేక్ వేయడం మర్చిపోయాడు. దీంతో కారు అదుపుతప్పి వెనక్కి దొర్లింది. గేటు వద్ద నిలబడి ఉన్న సరళా కటారియాను బలంగా ఢీకొట్టి, వెనుక ఉన్న గోడకు నలిపేసింది. కారు వెనక్కి వస్తున్న సమయంలో ఆమె గట్టిగా కేకలు వేసినా, మనవడు కారును ఆపడానికి ప్రయత్నించినా ఫలితం లేకుండా పోయింది. కారు డోర్ తీయడానికి మనవడు ప్రయత్నించే లోపే జరగకూడని నష్టం జరిగిపోయింది.
ఆస్పత్రికి తరలించినా దక్కని ప్రాణం:
తీవ్రంగా గాయపడిన ఆమెను వెంటనే ప్రైవేట్ ఆస్పత్రికి తరలించారు. అయితే ఆమె అప్పటికే మృతి చెందినట్లు వైద్యులు ప్రకటించారు. మృతురాలు సరళా కటారియా గతంలో ఆరోగ్య కార్యకర్తగా పనిచేశారు. ఆమె కుమారుడు ఫరూఖాబాద్‌లో మెడికల్ షాపు నిర్వహిస్తున్నారు.
పోలీసుల వివరణ:
ఈ ఘటనపై ఫతేగఢ్ పోలీసులు ఆదివారం ఉదయం ప్రకటన విడుదల చేశారు. హ్యాండ్‌బ్రేక్ వేయకపోవడం వల్లే కారు వెనక్కి వచ్చి ఆమెను గోడకు నలిపేసిందని ప్రాథమిక విచారణలో తేలింది. అయితే, కుటుంబ సభ్యుల నుండి ఇప్పటివరకు ఎలాంటి ఫిర్యాదు అందలేదని, ఫిర్యాదు అందిన తర్వాత తదుపరి చర్యలు తీసుకుంటామని పోలీసులు తెలిపారు.
ఒక చిన్న అజాగ్రత్త ఎంతటి విషాదాన్ని నింపుతుందో ఈ ఘటన మరోసారి నిరూపించింది.