పార్కులో జారిపడి రాళ్ల మధ్య పోయిన ఇయర్‌బడ్స్‌ను, ఆర్టిఫిషియల్ ఇంటెలిజెన్స్ యాప్ ‘చాట్ జీపీటీ’ (ChatGPT) సాయంతో ఒక వ్యక్తి తిరిగి పొందిన ఘటన సోషల్ మీడియాలో తీవ్ర ఆశ్చర్యాన్ని కలిగిస్తోంది.
శుక్రవారం సాయంత్రం తన చిన్నారితో కలిసి పార్కుకు వెళ్లిన సదరు వ్యక్తి, పాప పరిగెడుతుంటే పట్టుకోవడానికి వెళ్లాడు. ఆ సమయంలో అతడి షర్ట్ జేబులో ఉన్న ఇయర్‌బడ్స్ కేస్ కిందపడి తెరుచుకోవడంతో, అందులోని తెల్లటి ఇయర్‌బడ్స్ అక్కడున్న తెల్లటి రాళ్ల మధ్య పడి కనిపించకుండా పోయాయి.
సాయంత్రం సమయం కావడంతో చీకటి పడటం ప్రారంభమైంది. దాదాపు పది నిమిషాలకు పైగా వెతికినా ఆ చిన్న ఇయర్‌బడ్స్ దొరకకపోవడంతో అతను తీవ్ర నిరాశకు గురయ్యాడు. ప్రతిరోజూ తన పనుల కోసం ఆర్టిఫిషియల్ ఇంటెలిజెన్స్‌ను ఉపయోగించే అలవాటున్న ఆ వ్యక్తికి హఠాత్తుగా ఒక ఆలోచన వచ్చింది. వెంటనే ఆ రాళ్ల ప్రాంతాన్ని తన సెల్‌ఫోన్‌లో ఫోటోలు తీసి, AI యాప్‌లో అప్‌లోడ్ చేసి ఇయర్‌బడ్స్ ఎక్కడ ఉన్నాయో కనిపెట్టమని కోరాడు.
ఆ యాప్ సూచనల ప్రకారం ఫోటోను కొద్దిగా జూమ్ చేసి మళ్లీ అప్‌లోడ్ చేసిన ఒక్క నిమిషంలోనే, రాళ్ల మధ్య ఇయర్‌బడ్స్ సరిగ్గా ఉన్న ప్రదేశాన్ని బాక్స్ మార్క్ చేసి (గుర్తించి) చూపించింది ఆ AI యాప్. ఈ మొత్తం ప్రక్రియ కేవలం ఐదు నిమిషాల్లోనే పూర్తయిందని చెప్పిన ఆ వ్యక్తి, ఈ యాప్ సాయం లేకపోతే ఆ ఇయర్‌బడ్స్ ఖచ్చితంగా దొరికేవి కావు అని సంతోషంగా తెలిపాడు.
ఈ ఆసక్తికరమైన అనుభవాన్ని అతను ‘రెడ్డిట్’ (Reddit) సోషల్ మీడియా ప్లాట్‌ఫామ్‌లో పంచుకోగా, ఆ పోస్ట్ వెంటనే వైరల్ అయింది. పోగొట్టుకున్న వస్తువులను వెతకడానికి, రోజువారీ సమస్యలను పరిస్కరించడానికి ఆర్టిఫిషియల్ ఇంటెలిజెన్స్ యొక్క ‘ఇమేజ్ అనాలిసిస్’ (Image Analysis) సామర్థ్యం ఎంతగా ఉపయోగపడుతుందో అని నెటిజన్లు ఆశ్చర్యపోతూ కామెంట్లు చేస్తున్నారు.
Leave a Reply