కర్ణాటక రాష్ట్రం రామనగర జిల్లాలో అదృశ్యమైన ఒక యువకుడి మరణం వెనుక ఉన్న మిస్టరీని పోలీసులు ఛేదించారు. అతడిని తన స్నేహితులే నీటిలో ముంచి చంపినట్లు విచారణలో దిగ్భ్రాంతికరమైన విషయాలు వెలుగులోకి వచ్చాయి.
ఏం జరిగింది? మాగడి తాలూకా కళ్యాణపురానికి చెందిన వినోద్ కుమార్ (26) అనే యువకుడు, గత జనవరి 1వ తేదీన నూతన సంవత్సర వేడుకల కోసం తన స్నేహితులతో కలిసి బయటకు వెళ్ళాడు. మద్యం తాగే సమయంలో, దానిలో కలుపుకోవడానికి కొబ్బరి నీళ్ల కోసం వినోద్‌ను స్నేహితులు బలవంతంగా కొబ్బరి చెట్టు ఎక్కించారు. అయితే, చెట్టు ఎక్కుతుండగా ప్రమాదవశాత్తు కింద పడిపోవడంతో వినోద్ వెన్నెముకకు తీవ్ర గాయమైంది.
మారణహోమం: గాయపడిన వినోద్‌కు చికిత్స అందించాలంటే లక్షల రూపాయలు ఖర్చవుతుందని స్నేహితులు సుదీప్ మరియు ప్రజ్వల్ భయపడ్డారు. అతడిని ఆసుపత్రికి తీసుకెళ్లడానికి బదులుగా, చంపేయాలని ప్లాన్ వేశారు. వినోద్‌ను ఇంటికి తీసుకెళ్తున్నామని నమ్మించి, వాజరహళ్లి గ్రామంలోని ఒక చెరువులో ముంచి హత్య చేశారు. ఎవరికీ అనుమానం రాకుండా ఉండటానికి, శవాన్ని బయటకు తీసి, దానికి పెద్ద రాయి కట్టి సమీపంలోని ఒక బావిలో పడేశారు.
వినోద్ కనిపించడం లేదని తల్లిదండ్రులు ఇచ్చిన ఫిర్యాదుతో రంగంలోకి దిగిన పోలీసులు, సెల్ ఫోన్ సిగ్నల్స్ ఆధారంగా స్నేహితులను అరెస్ట్ చేసి విచారించగా ఈ దారుణం వెలుగులోకి వచ్చింది.