చెవిలో పెట్టుకోవాల్సిన అవసరం లేదు.! 9.5 గంటల బ్యాటరీతో కొత్త ఇయర్‌బడ్స్‌ను పరిచయం చేసిన శాంసంగ్.!!!

శాంసంగ్ సంస్థ తన గెలాక్సీ ఇయర్‌బడ్స్ లైనప్‌లో విభిన్నమైన డిజైన్‌తో కొత్త ‘గెలాక్సీ బడ్స్ ఆన్’ (Galaxy Buds On) ఇయర్‌బడ్స్‌ను ఆవిష్కరించింది.

సాధారణ ఇయర్‌బడ్స్ లాగా వీటిని చెవిలోపల పెట్టుకోవాల్సిన అవసరం లేదు. చెవి వెలుపలి భాగంలో క్లిప్‌లా తగిలించుకునేలా (Clip-on design) దీన్ని డిజైన్ చేశారు. దీని ఓపెన్ డిజైన్ కారణంగా, పాటలు వింటున్నప్పుడు కూడా చుట్టుపక్కల శబ్దాలను సులభంగా వినవచ్చు.

ఈ ఇయర్‌బడ్స్ ధరను దక్షిణ కొరియాలో 2,99,000 వోన్‌లుగా నిర్ణయించారు. భారతీయ కరెన్సీలో ఇది సుమారు ₹21,000. తొలి దశలో అక్టోబర్ 27న దక్షిణ కొరియాలో ఇవి అమ్మకానికి రానున్నాయి. ప్రస్తుతం నలుపు రంగులో పరిచయం అవుతున్న ఈ ఇయర్‌బడ్స్, ఆ తర్వాత ఇతర దేశాల్లో కూడా అమ్మకానికి వస్తాయని సంస్థ తెలిపింది. వివిధ రకాల చెవుల పరిమాణాలకు సరిపోయేలా దీని క్లిప్-ఆన్ డిజైన్‌ను ప్రత్యేకంగా రూపొందించారు.

ఆడియో నాణ్యతను పెంచేందుకు ఇందులో ట్విన్‌బూస్ట్ (TwinBoost) స్పీకర్లు, ఆటోమేటిక్ వాల్యూమ్ కంట్రోల్ (Automatic volume control) సదుపాయం కల్పించారు. చుట్టుపక్కల శబ్దాలకు అనుగుణంగా వాల్యూమ్‌ను మార్చుకునే సదుపాయం, ఇయర్‌బడ్స్ నుంచి బయటకు వచ్చే శబ్దాన్ని (Audio Leakage) తగ్గించే టెక్నాలజీ కూడా ఇందులో ఉన్నాయి. ఒక్కసారి ఫుల్ ఛార్జ్ చేస్తే 9.5 గంటల వరకు నిరంతరాయంగా పాటలు వినవచ్చని శాంసంగ్ తెలిపింది. అలాగే, ఇందులో క్వాల్కమ్ స్నాప్‌డ్రాగన్ S7 Gen 1 (Snapdragon S7 Gen 1) సౌండ్ ప్లాట్‌ఫామ్ మరియు క్లాస్-D ఆంప్లిఫైయర్‌ను ఉపయోగించారు.

కాల్స్ మాట్లాడుతున్నప్పుడు వాయిస్ స్పష్టంగా రికార్డ్ అవ్వడానికి మూడు మైక్రోఫోన్లు, ఎముకల కంపనం (Bone conduction) ఆధారిత వాయిస్ సెన్సార్, మెషిన్ లెర్నింగ్ టెక్నాలజీని అందించారు. దీనికి తోడు, అనుకూలమైన (కాంపాటబుల్) గెలాక్సీ ఏఐ (Galaxy AI) డివైజ్‌లతో కనెక్ట్ చేసి వాడినప్పుడు జెమినీ లైవ్ (Gemini Live), వాయిస్ నోట్స్ రికార్డింగ్, తల ఊపుతూ కాల్స్ లిఫ్ట్ చేయడం (Head gestures) లాంటి ఫీచర్లను కూడా వాడుకోవచ్చు. అయితే, బ్లూటూత్ వెర్షన్, ఆడియో కోడెక్ మరియు బ్యాటరీ కెపాసిటీ లాంటి కొన్ని సాంకేతిక వివరాలను కంపెనీ ఇంకా వెల్లడించలేదు.