మధ్యప్రాచ్యంలో ఇరాన్ మరియు ఇజ్రాయెల్ మధ్య మొదలైన యుద్ధం, ఇప్పుడు ప్రపంచ దేశాల ఇంధన అవసరాలకు పెద్ద ముప్పుగా మారింది. ముఖ్యంగా, ఇరాన్ ‘హార్ముజ్ జలసంధి’ (Strait of Hormuz) ని మూసివేయడంతో ముడిచమురు సరఫరా నిలిచిపోయింది. దీనివల్ల శ్రీలంకలో పెట్రోల్, డీజిల్‌కు తీవ్ర కొరత ఏర్పడింది.
ప్రస్తుతం అక్కడ పెట్రోల్ ధర ₹398, డీజిల్ ధర ₹382 వద్ద విక్రయిస్తుండటంతో, పరిస్థితిని అదుపు చేసేందుకు శ్రీలంక ప్రభుత్వం వారానికి 4 రోజులు మాత్రమే పని దినాలుగా ప్రకటించి, ‘వర్క్ ఫ్రమ్ హోమ్’ పద్ధతిని తప్పనిసరి చేసింది.
శ్రీలంకలోని హంబన్‌తోట ఓడరేవులో భారీ చమురు శుద్ధి కర్మాగారాన్ని నిర్మించేందుకు 3.7 బిలియన్ డాలర్ల ఒప్పందం చేసుకున్న చైనా, ఈ క్లిష్ట సమయంలో సాయం చేయకుండా చేతులెత్తేసింది. దీంతో దిక్కుతోచని స్థితిలో ఉన్న శ్రీలంక అధ్యక్షుడు అనుర కుమార దిస్సానాయకే, భారత ప్రధాని నరేంద్ర మోదీకి ఫోన్ చేసి సాయం కోరారు.
మరుసటి కొన్ని గంటల్లోనే ‘పొరుగు దేశానికి ప్రాధాన్యత’ (Neighbourhood First) విధానం ప్రకారం, భారత్ అత్యవసర సాయంగా 20,000 మెట్రిక్ టన్నుల డీజిల్ మరియు 18,000 మెట్రిక్ టన్నుల పెట్రోల్‌ను శ్రీలంకకు పంపింది. “ఆపదలో ఆదుకునేవాడే నిజమైన మిత్రుడు” అంటూ శ్రీలంక ప్రతిపక్ష నేత సజిత్ ప్రేమదాస భారత్‌పై ప్రశంసల జల్లు కురిపించారు.