ఢిల్లీ పోలీసుల క్రైమ్ బ్రాంచ్ మరియు సైబర్ సెల్ విభాగాలు చైనాతో సంబంధం ఉన్న ఒక అంతర్జాతీయ సైబర్ సిండికేట్‌ను బట్టబయలు చేశాయి. ఈ ముఠా ఢిల్లీకి చెందిన ఒక చార్టర్డ్ అకౌంటెంట్ (CA)ను లక్ష్యంగా చేసుకుని ఏకంగా ₹47 లక్షలు కాజేసింది. ఈ కేసులో ఇప్పటివరకు 8 మంది నిందితులను అరెస్ట్ చేయగా, దేశవ్యాప్తంగా నమోదైన 1167 సైబర్ ఫిర్యాదులతో వీరికి సంబంధం ఉన్నట్లు తేలింది.
చైనా మాస్టర్‌మైండ్ ‘టామ్’ కనెక్షన్
ఈ మొత్తం కుంభకోణం వెనుక చైనాలో ఉన్న ‘టామ్’ అనే వ్యక్తి మాస్టర్‌మైండ్‌గా ఉన్నట్లు విచారణలో వెల్లడైంది. అతను టెలిగ్రామ్ ద్వారా భారతీయ ఏజెంట్లకు సూచనలు ఇచ్చేవాడు. బీహార్‌కు చెందిన ఆశిష్ కుమార్ అలియాస్ జాక్, ఈ టామ్‌కు ప్రధాన అనుచరుడిగా వ్యవహరించేవాడు. ప్రతి అక్రమ లావాదేవీపై వీరికి 1 నుంచి 1.5% కమిషన్ లభించేది. తాము ఒక చట్టబద్ధమైన ఇన్వెస్ట్‌మెంట్ సంస్థగా నమ్మించడానికి వీరు నోయిడాలో ఒక నకిలీ కార్యాలయాన్ని కూడా తెరిచారు.
ఢిల్లీ సీఏ (CA) ఎలా మోసపోయారు?
సైబర్ నేరగాళ్లు బాధితుడిని ఒక టెలిగ్రామ్ గ్రూపులో చేర్చి, ‘ఈరోజు కొనండి-రేపు అమ్మండి’ (BTST) మరియు అదిరిపోయే ఐపీఓ (IPO) రేటింగ్స్ ద్వారా రోజువారీ భారీ లాభాలు వస్తాయని ఆశ చూపారు.
- నకిలీ వెబ్‌సైట్: stock.durocaspitall.com అనే నకిలీ వెబ్‌సైట్‌లో పెట్టుబడి పెట్టాలని బాధితుడిని ప్రేరేపించారు.
- భారీ పెట్టుబడి: లాభాల ఆశతో ఆ సీఏ రెండు నెలల వ్యవధిలో ₹47,23,015 పెట్టుబడి పెట్టారు.
- బెదిరింపులు: బాధితుడు తన డబ్బును విత్‌డ్రా చేసుకోవడానికి ప్రయత్నించినప్పుడు, నిందితులు చట్టపరమైన ఇబ్బందులు వస్తాయని బెదిరించి, డబ్బు తీయడానికి మరికొంత మొత్తం వసూలు చేశారు.
7 బ్యాంకులు మరియు డొల్ల కంపెనీలు
మోసం చేసిన డబ్బును దారి మళ్లించడానికి నిందితులు ఒక సంక్లిష్టమైన నెట్‌వర్క్‌ను సృష్టించారు. ఇండస్ఇండ్, హెచ్‌డిఎఫ్‌సి (HDFC), యస్ బ్యాంక్, ఐడిఎఫ్‌సి (IDFC) ఫస్ట్ వంటి 7 ప్రముఖ బ్యాంకుల్లో నకిలీ సంస్థల పేరుతో కరెంట్ ఖాతాలు తెరిచారు. హర్షిత ఫర్నిచర్స్, బుబాయ్ ఇన్‌స్టంట్ షాప్ వంటి షెల్ కంపెనీలను డబ్బును ఇటు అటు మార్చడానికి ఉపయోగించారు.
వెంటనే తొలగించాల్సిన ఆ 14 యాప్‌లు ఇవే!
విచారణలో వెల్లడైన ఈ 14 నకిలీ ట్రేడింగ్ మరియు ఇన్వెస్ట్‌మెంట్ యాప్‌లు మీ ఫోన్‌లో ఉంటే వెంటనే డిలీట్ చేయండి:
- EXVENTOR
- PAYINDIA
- FXROAD
- QUANTA
- LANTAVA
- QUANTRO
- BORIS
- SEVEXA
- INDIA CORPORATE
- CAPPLACE
- TRADEGRIP
- EZINVEST
- INDUX
- INDEXFLUX