ఫార్చ్యూన్ టెల్లింగ్ మెషిన్: అదృష్టం ఎప్పుడు, ఏ రూపంలో వరిస్తుందో ఎవరూ ఊహించలేరు. ఒక్కోసారి దశాబ్దాల క్రితం నాటి నమ్మకం లేదా ఒక చిన్న కాగితం ముక్క మనిషి రాతను మార్చేస్తుంది. అమెరికాలోని మిచిగాన్కు చెందిన 56 ఏళ్ల స్టీఫెన్ హ్యూస్జెన్ జీవితంలో సరిగ్గా ఇలాంటి సంఘటనే జరిగింది.
స్టీఫెన్ ఇటీవల జరిగిన ‘పవర్బాల్ లాటరీ’ (Powerball Lottery) లో ఏకంగా 1 మిలియన్ డాలర్ల (సుమారు రూ. 8.3 కోట్లు) బంపర్ ప్రైజ్ గెలుచుకున్నారు. అయితే, ఈ గెలుపు వెనుక ఉన్న అసలు రహస్యం, ఆ లక్కీ నంబర్లు అతనికి ఎలా దొరికాయనేదే! ఇదంతా వినడానికి ఒక సినిమా కథలా అనిపించినా.. 30 ఏళ్ల క్రితం నాటి ఒక భవిష్యవాణి ఇప్పుడు నిజమైంది.
ఆ మిషన్ వెనుక 30 ఏళ్ల నాటి రహస్యం
తాను లాటరీ గెలవడం వెనుక మూడు దశాబ్దాల నాటి ఒక ఆసక్తికరమైన కథ ఉందని స్టీఫెన్ హ్యూస్జెన్ లాటరీ అధికారులకు తెలిపారు. సుమారు 30 ఏళ్ల క్రితం ఆయన లాస్ వేగాస్ పర్యటనకు వెళ్లారు. అక్కడ ఆయన భవిష్యత్తు చెప్పే ‘జోల్టర్ ఫార్చ్యూన్ టెల్లింగ్ మెషిన్’ (Zoltar Fortune Telling Machine) ను సరదాగా ఉపయోగించారు. ఆ మిషన్ నుండి వచ్చిన ఒక చిన్న జాతకం చీటీపై కొన్ని ‘లక్కీ నంబర్లు’ రాసి ఉన్నాయి. స్టీఫెన్ ఆ నంబర్లను పారేయకుండా జాగ్రత్తగా దాచుకున్నారు. గత 30 ఏళ్లుగా ఆయన నిరంతరాయంగా ఆ నంబర్లపైనే లాటరీ టికెట్లు కొంటూ వస్తున్నారు.
కోట్లాది రూపాయల విజయం ఎలా దక్కింది?
ఏప్రిల్ 22న జరిగిన పవర్బాల్ డ్రా కోసం స్టీఫెన్ ఆన్లైన్లో ఒక టికెట్ కొనుగోలు చేశారు. దానికి ఎప్పటిలాగే ఆ జోల్టర్ మిషన్ ఇచ్చిన పాత నంబర్లనే ఎంచుకున్నారు. లాటరీ ఫలితాలు విడుదలయ్యాక.. స్టీఫెన్ టికెట్ నంబర్లు డ్రాలోని ఐదు తెల్లటి బంతుల (White Balls) నంబర్లతో పూర్తిగా సరిపోలాయి. ఆ లక్కీ నంబర్లు: 24-29-32-49-63. ఆయన ప్రధాన పవర్బాల్ నంబర్ను అందుకోలేకపోయినప్పటికీ, ఈ ఐదు నంబర్లు మ్యాచ్ కావడంతోనే ఆయనకు 10 లక్షల డాలర్ల (1 మిలియన్) భారీ బహుమతి లభించింది.
విజేత స్పందన
లాటరీ డ్రా జరిగిన మరుసటి రోజు ఉదయం స్టీఫెన్ తన ఈమెయిల్ (Email) చూసుకోగా, మిచిగాన్ లాటరీ నుండి వచ్చిన విజేత సందేశాన్ని చూసి ఒక్కసారిగా షాకయ్యారు. వెంటనే గట్టిగా అరుస్తూ తన భార్యను పిలిచి, “ఇది నిజమేనా?” అని అడిగారు. తనకు ఇప్పటికీ ఈ విషయాన్ని పూర్తిగా నమ్మలేకపోతున్నానని, లాటరీ డబ్బు చేతికి వచ్చేంతవరకు ఇదంతా ఒక కలలాగే అనిపిస్తుందని స్టీఫెన్ ఆనందం వ్యక్తం చేశారు.
ఈ డబ్బుతో స్టీఫెన్ ఏం చేయబోతున్నారు?
ఇంత పెద్ద మొత్తంలో డబ్బు గెలుచుకున్న తర్వాత స్టీఫెన్ తన భవిష్యత్తు ప్రణాళికలను పంచుకున్నారు. ఈ డబ్బుతో తాను మొదట తన ఇల్లు, కారుపై ఉన్న అప్పులను పూర్తిగా తీర్చేస్తానని చెప్పారు. ఆ తర్వాత తన భార్యతో కలిసి ఒక అద్భుతమైన విహారయాత్రకు (Vacation) వెళ్లాలని ప్లాన్ చేస్తున్నారు. మిగిలిన మొత్తాన్ని తన పదవీ విరమణ (Retirement) జీవితం ప్రశాంతంగా గడపడం కోసం ఫిక్స్డ్ డిపాజిట్ చేయనున్నట్లు తెలిపారు.