నేటి డిజిటల్ యుగంలో ఆఫీస్ మెసేజ్‌ల నుండి ముఖ్యమైన సమాచారం వరకు అన్నీ ఈమెయిల్ ద్వారానే వస్తుంటాయి. దీనివల్ల జీమెయిల్ స్టోరేజ్ త్వరగా నిండిపోతుంది మరియు స్క్రీన్‌పై ‘స్టోరేజ్ అలర్ట్’ కనిపిస్తుంది. స్టోరేజ్ నిండిపోతే కొత్త ఈమెయిల్‌లు రావడం కూడా ఆగిపోతాయి. ఇలాంటప్పుడు చాలామంది డబ్బులు పెట్టి అదనపు స్టోరేజ్ కొంటుంటారు. కానీ, కొన్ని స్మార్ట్ ట్రిక్స్ ఉపయోగిస్తే నిమిషాల్లో మీ జీమెయిల్‌ను క్లీన్ చేసుకోవచ్చు.
గూగుల్ డ్రైవ్ మరియు ఫొటోస్ కూడా జీమెయిల్ స్టోరేజ్‌తో అనుసంధానమై ఉంటాయి. ఏళ్ల తరబడి పేరుకుపోయిన అనవసర ఈమెయిల్‌లు, పెద్ద అటాచ్‌మెంట్ ఫైల్స్ మీ స్టోరేజ్‌ను మింగేస్తుంటాయి. ఈ క్రింది స్టెప్స్ ఫాలో అయ్యి సులభంగా స్పేస్ ఖాళీ చేసుకోండి.
1. పెద్ద ఫైల్స్‌ను తొలగించండి
ముందుగా మీ ఫోన్‌లో జీమెయిల్ ఓపెన్ చేయండి. సెర్చ్ బార్‌లోకి వెళ్లి ఈ క్రింది ఫిల్టర్లను ఒకదాని తర్వాత ఒకటి టైప్ చేసి సెర్చ్ చేయండి:
- filename:pdf larger:10mb – ఇది 10MB కంటే పెద్దగా ఉన్న PDF ఫైళ్లను వెతికి పెడుతుంది.
- older_than:1y – ఏడాది కంటే పాతవైన ఈమెయిల్‌లను ఇది చూపిస్తుంది.
- has:attachment – అటాచ్‌మెంట్లు ఉన్న ఈమెయిల్‌ల కోసం దీనిని వాడండి.
- filename:mp4 లేదా filename:zip – వీడియోలు మరియు జిప్ ఫైళ్లను గుర్తించడానికి ఇది ఉపయోగపడుతుంది.
ఈ ఫిల్టర్లను వాడి అవసరం లేని పెద్ద ఈమెయిల్‌లను డిలీట్ చేస్తే.. మీ స్టోరేజ్ ఒక్కసారిగా ఖాళీ అవుతుంది.
2. గూగుల్ ఫొటోస్ (Google Photos) క్లీన్ చేయండి
వాట్సాప్ బ్యాకప్ ద్వారా వచ్చే అనవసరమైన స్క్రీన్‌షాట్లు, మీమ్స్ మరియు వీడియోలు కూడా స్టోరేజ్‌ను నింపేస్తాయి. గూగుల్ ఫొటోస్ యాప్‌లోకి వెళ్లి, Utilities మెనూలోకి వెళ్ళండి. అక్కడ మీకు అవసరం లేని పెద్ద వీడియోలు మరియు ఫైళ్లను డిలీట్ చేసే ఆప్షన్ కనిపిస్తుంది. దీనివల్ల చాలా స్పేస్ ఆదా అవుతుంది.
3. ప్రమోషనల్ ఈమెయిల్‌లను ఇలా డిలీట్ చేయండి
మార్కెటింగ్ మరియు అడ్వర్టైజ్‌మెంట్ ఈమెయిల్‌లు మన ఇన్-బాక్స్‌ను నింపేస్తుంటాయి. వీటిని తొలగించడానికి సెర్చ్ బార్‌లో category:promotions అని టైప్ చేయండి. అన్ని ప్రమోషనల్ ఈమెయిల్‌లను ఒకేసారి సెలెక్ట్ చేసి డిలీట్ చేయండి.
ఈ సులభమైన పద్ధతులను పాటించడం ద్వారా ఒక్క రూపాయి ఖర్చు లేకుండా మీ గూగుల్ అకౌంట్‌లో స్టోరేజ్‌ని ఖాళీ చేసి, ముఖ్యమైన ఈమెయిల్‌ల కోసం స్థలాన్ని కేటాయించుకోవచ్చు.