ప్రధానమంత్రి నరేంద్ర మోదీ తన ఐదు దేశాల పర్యటనలో భాగంగా నెదర్లాండ్స్ సందర్శించినప్పుడు అక్కడ ఏర్పాటు చేసిన ఒక భారతీయ కమ్యూనిటీ కార్యక్రమంలో ప్రసంగించారు.
ది హేగ్ (The Hague) లో జరిగిన ఈ సమావేశంలో ఆయన భారతదేశంలో ఇటీవల ముగిసిన అసెంబ్లీ ఎన్నికల గురించి మాట్లాడుతుండగా.. ‘ఝాల్ మురీ’ (బెంగాలీ స్నాక్) నెదర్లాండ్స్కు కూడా చేరుకుందా? అంటూ సరదాగా వ్యాఖ్యానించారు. ఆయన ప్రసంగంలో అసోం, పశ్చిమ బెంగాల్ ఎన్నికల ప్రస్తావన రాగానే అక్కడి ప్రవాస భారతీయులు పెద్ద పెట్టున చప్పట్లు కొట్టారు. ఆ సమయంలో పీఎం మోదీ నవ్వుతూ, “ఇక్కడికి కూడా ఝాల్ మురీ వచ్చేసిందా?” అని ప్రశ్నించారు. పశ్చిమ బెంగాల్ ఎన్నికల ప్రచార సమయంలో ప్రధాని మోదీ అక్కడ ఒక స్థానిక దుకాణంలో ఆగి ఈ ‘ఝాల్ మురీ’ అనే స్నాక్ తినడం అప్పట్లో సోషల్ మీడియాలో బాగా వైరల్ అయ్యింది.
యునైటెడ్ అరబ్ ఎమిరేట్స్ (UAE) లో సంక్షిప్త పర్యటన ముగించుకుని, అధ్యక్షుడు మహ్మద్ బిన్ జాయెద్ అల్ నహ్యాన్తో సమావేశమైన అనంతరం పీఎం మోదీ నెదర్లాండ్స్ చేరుకున్నారు. ఇది ఆయన ఐదు దేశాల పర్యటనలో రెండవ విడత. దీని తర్వాత ఆయన మే 17-18 తేదీలలో స్వీడన్, మే 18-19 తేదీలలో నార్వేలో పర్యటించి 3వ ఇండియా-నార్డిక్ సదస్సులో పాల్గొంటారు. తన పర్యటన చివరి విడతలో మే 19-20 తేదీల మధ్య ఇటలీని సందర్శిస్తారు.
అసెంబ్లీ ఎన్నికల్లో ఓటింగ్ శాతాన్ని కొనియాడిన ప్రధాని
ప్రధాని మోదీ తన ప్రసంగంలో అసెంబ్లీ ఎన్నికలలో నమోదైన రికార్డు స్థాయి ఓటింగ్ శాతాన్ని అభినందించారు.
“ప్రజల కలలు నిజమైనప్పుడు, ప్రజాస్వామ్యంపై వారి నమ్మకం మరింత బలపడుతుంది. దీనికి మన అసెంబ్లీ ఎన్నికలనే ఉదాహరణగా తీసుకుందాం” అని ప్రధానమంత్రి అన్నారు.
ఈసారి అసోం, పశ్చిమ బెంగాల్, తమిళనాడు, కేరళ మరియు పుదుచ్చేరి ఎన్నికలలో 80 నుండి 90 శాతం వరకు భారీగా ఓటింగ్ నమోదు కావడాన్ని పీఎం మోదీ హైలైట్ చేశారు. భారతదేశం తన పౌరులందరి “ప్రజాస్వామ్య భాగస్వామ్యాన్ని గౌరవిస్తుంది” అని ఆయన స్పష్టం చేశారు. ప్రతి ఎన్నికలతో దేశంలో ప్రజాస్వామ్య ప్రక్రియ మరింత బలోపేతం అవుతోందని, ముఖ్యంగా మహిళల భాగస్వామ్యం గణనీయంగా పెరిగిందని ఏఎన్ఐ (ANI) వార్తా సంస్థ నివేదించింది.
‘భారతదేశ ఆకాంక్షలు సరిహద్దులకే పరిమితం కావు’
భారతదేశాన్ని “అవకాశాల భూమి” గా అభివర్ణించిన పీఎం మోదీ, దేశ ప్రజల ఆకాంక్షలకు హద్దులు లేవన్నారు.
- అవకాశాల దేశం: “21వ శతాబ్దపు భారతదేశం అవకాశాల నిలయం. ఇది సాంకేతికత (Technology) తో పాటు మానవత్వాన్ని (Humanity) కూడా సమానంగా నడిపించే దేశం” అని పేర్కొంటూ.. అభివృద్ధి చెందిన భారత నిర్మాణంలో భాగస్వాములు కావాలని ప్రవాస భారతీయులకు పిలుపునిచ్చారు.
- గ్లోబల్ లక్ష్యాలు: భారతదేశ ఆకాంక్షలు కేవలం మన సరిహద్దులకే పరిమితం కాదని.. ఒలింపిక్స్కు ఆతిథ్యం ఇవ్వడం, గ్లోబల్ మ్యానుఫ్యాక్చరింగ్ హబ్గా మారడం మరియు గ్రీన్ ఎనర్జీ (హరిత ఇంధనం) లో ప్రపంచానికి నాయకత్వం వహించడం మన లక్ష్యాలని చెప్పారు.
దాదాపు 40 నిమిషాలకు పైగా సాగిన తన ప్రసంగంలో, భారతదేశంలో పెట్టుబడులు పెట్టాల్సిందిగా “భారత మిత్రులందరికీ” పిలుపునిచ్చారు. “ఈ రోజు దేశం చెబుతోంది – మాకు కేవలం మార్పు మాత్రమే వద్దు; అత్యుత్తమమైనది కావాలి. కేవలం అత్యుత్తమమైనదే కాదు, అత్యంత వేగంగా కావాలి” అని పీఎం మోదీ పేర్కొన్నారు.