నాసిక్: దేశీయ ఐటీ దిగ్గజం టాటా కన్సల్టెన్సీ సర్వీసెస్ (TCS) నాసిక్ కార్యాలయం వేదికగా సాగుతున్న అరాచకాలు దేశవ్యాప్తంగా ప్రకంపనలు సృష్టిస్తున్నాయి. కేవలం పని ఒత్తిడి మాత్రమే అనుకుంటే పొరపాటే.. అక్కడ లైంగిక వేధింపులు, బలవంతపు మత మార్పిడి యత్నాలు, అమానవీయ దూషణలు వెరసి ఉద్యోగుల పాలిట అది ఒక నరకకూపంగా మారింది. తాజాగా ఒక పురుష ఉద్యోగి చేసిన ఆరోపణలు వింటే ఒళ్లు గగుర్పొడుస్తుంది.
ఒక్కొక్కటిగా వీడుతున్న ‘టాక్సిక్’ మిస్టరీ!
ఈ వ్యవహారంలో బాధితుడు పోలీసులకు ఇచ్చిన ఫిర్యాదులో సంచలన విషయాలు వెల్లడించారు:
- నీచమైన వ్యాఖ్యలు: “నీకు పిల్లలు కావాలంటే నీ భార్యను నా దగ్గరకు పంపించు” అంటూ ఒక ఉన్నతాధికారి తనను అత్యంత నీచంగా దూషించాడని ఆ ఉద్యోగి వాపోయారు.
- బలవంతపు మత ఆచారాలు: హిందూ ధర్మాన్ని పాటించే తనను బలవంతంగా టోపీ ధరించాలని, నమాజ్ చేయాలని, కల్మా చదవాలని టీమ్ లీడర్లు తౌసిఫ్ అక్తర్, డానిష్ షేక్ ఒత్తిడి చేసేవారని ఆరోపించారు.
- ఆహారపు అలవాట్లపై దాడి: కటిక శాఖాహారి అయిన తనతో బలవంతంగా మాంసాహారం తినిపించడానికి ప్రయత్నిస్తూ, హేళన చేసేవారని పేర్కొన్నారు. 2023 ఈద్ సమయంలో ఒక సహోద్యోగి ఇంటికి తీసుకెళ్లి బలవంతంగా మతపరమైన ఫోటోలు తీసి ఆఫీసు గ్రూపుల్లో షేర్ చేసి అవమానించారని తెలిపారు.
మహిళా ఉద్యోగులపైనా లైంగిక వేధింపులు!
ఈ ఉదంతం తొలుత ఒక 23 ఏళ్ల మహిళా ఉద్యోగి ఫిర్యాదుతో బయటపడింది. నిందితుల్లో ఒకడు తనను బలవంతంగా ముద్దు పెట్టుకోవడానికి ప్రయత్నించాడని, మతం మార్చుకుని పెళ్లి చేసుకోవాలని వేధించాడని ఆమె ఆరోపించారు. ఆమె ఫిర్యాదు తర్వాత మరికొంతమంది మహిళలు ధైర్యంగా ముందుకు వచ్చి తమకు ఎదురైన చేదు అనుభవాలను వివరించారు.
అండగా నిలవాల్సిన హెచ్ఆర్ (HR) ఏమైంది?
ఈ కేసులో అత్యంత విచారకరమైన విషయం ఏమిటంటే, బాధితులకు అండగా ఉండాల్సిన హెచ్ఆర్ ఎగ్జిక్యూటివ్ నిదా ఖాన్ నిందితులకు కొమ్ముకాసినట్లు ఆరోపణలు వస్తున్నాయి.
- ఫిర్యాదుల అణిచివేత: అంతర్గత లైంగిక వేధింపుల నిరోధక కమిటీ (POSH)లో సభ్యురాలిగా ఉన్న నిదా ఖాన్, బాధితుల ఫిర్యాదులను పట్టించుకోకపోగా, కేసులను ఉపసంహరించుకోవాలని వారిని బెదిరించినట్లు సమాచారం. దీంతో పోలీసులు ఆమెను కూడా అరెస్ట్ చేశారు.
- మరో అధికారి అశ్విని చైనానీని కోర్టు 14 రోజుల జ్యుడీషియల్ కస్టడీకి పంపింది.
టీసీఎస్ స్పందన.. ఇన్వెస్టిగేషన్ షురూ!
ఈ వ్యవహారంపై టాటా గ్రూప్ చైర్మన్ ఎన్. చంద్రశేఖరన్ తీవ్రంగా స్పందించారు. ఈ ఆరోపణలు అత్యంత ఆందోళనకరమని, దీనిపై సమగ్ర విచారణకు ఆదేశించామని తెలిపారు. ప్రస్తుతం నాసిక్ ఆఫీసు ఉద్యోగుల భద్రత దృష్ట్యా అందరినీ ‘వర్క్ ఫ్రమ్ హోమ్’ చేయాలని కంపెనీ ఆదేశించింది.
రంగంలోకి దిగిన పోలీసులు: 9 కేసులు.. పలువురు అరెస్ట్!
నాసిక్ పోలీసులు ఇప్పటివరకు 9 కేసులు నమోదు చేశారు. సుమారు 78 అనుమానాస్పద కాల్ రికార్డులు, ఈమెయిల్స్, చాట్ మెసేజ్లను స్వాధీనం చేసుకున్నారు. దీని వెనుక ఏవైనా ఆర్థిక లావాదేవీలు ఉన్నాయా అనే కోణంలోనూ దర్యాప్తు సాగుతోంది.