“ట్యాంకులోకి దిగినవారు శవాలై తేలిన ఘోరం!” – విషవాయువు పీల్చి విద్యార్థులు విలవిల్లాడి మృతిచెందిన విషాద నేపథ్యం..!!!

ఉత్తరప్రదేశ్ రాష్ట్రం బృందావన్‌లోని ఓ గురుకులంలో భూగర్భ నీటి తొట్టిని (అండర్‌గ్రౌండ్ సంప్) శుభ్రం చేసే పనికి దిగిన నలుగురు విద్యార్థులు, ట్యాంకులో వెలువడిన విషవాయువు పీల్చి ఊపిరాడక దుర్మరణం చెందిన ఘటన దేశవ్యాప్తంగా తీవ్ర దిగ్భ్రాంతిని, శోకాన్ని నింపింది.

ఎలాంటి రక్షణ పరికరాలు లేకుండా విద్యార్థులను ఇంత ప్రమాదకరమైన పనికి పురమాయించిన గురుకుల యాజమాన్యపు నిర్లక్ష్యమే ఈ ఘోర దుర్ఘటనకు ప్రధాన కారణమని తీవ్ర ఆరోపణలు వెల్లువెత్తుతున్నాయి. బృందావన్ గురుకుల ప్రాంగణంలోని భూగర్భ ట్యాంకులో పేరుకుపోయిన వ్యర్థాలను శుభ్రం చేసేందుకు కొందరు విద్యార్థులను రంగంలోకి దించారు.

ఆ సమయంలో మొదట ట్యాంకులోకి దిగిన విద్యార్థి, అక్కడ దట్టంగా అలుముకున్న విషవాయువును పీల్చడంతో క్షణాల్లో స్పృహతప్పి కుప్పకూలిపోయాడు. అతడికి ఏమైందో తెలియక, కాపాడాలన్న కంగారుతో ఒకరి వెంట ఒకరు ట్యాంకులోకి దిగిన మిగతా విద్యార్థులు కూడా అదే విషవాయువు ప్రభావానికి గురై లోపలే ఊపిరాడక విలవిల్లాడుతూ ప్రాణాలు విడిచారు.

సమాచారం అందుకున్న వెంటనే ఘటనా స్థలానికి చేరుకున్న సహాయక బృందాలు, పోలీసులు తీవ్రంగా శ్రమించి ట్యాంకులో నుంచి నలుగురు విద్యార్థుల మృతదేహాలను వెలికితీసి పోస్టుమార్టం నిమిత్తం తరలించారు.

విద్యను అభ్యసించడానికి, సంస్కారాన్ని నేర్చుకోవడానికి గురుకులానికి వచ్చిన విద్యార్థులను ఎలాంటి భద్రతా ప్రమాణాలు పాటించకుండా విషపూరితమైన భూగర్భ తొట్టిలోకి దింపి బలితీసుకున్న ఘటనపై పోలీసులు కేసు నమోదు చేసి ముమ్మర దర్యాప్తు చేస్తున్నారు. గురుకుల నిర్వాహకుల నిర్లక్ష్యం కారణంగా నలుగురు చిన్నారుల నిండు ప్రాణాలు గాల్లో కలిసిపోవడంతో ఆ ప్రాంతంలో తీవ్ర విషాద ఛాయలు అలముకున్నాయి.