టెహ్రాన్: ఇరాన్‌పై పదాతి దళాలతో (Ground Attack) దాడి చేయడానికి అమెరికా ప్రణాళికలు రచిస్తోందనే సమాచారం వెలువడుతోంది. ఒకవేళ అమెరికా గనుక ఇరాన్ గడ్డపైకి సైన్యాన్ని పంపితే, ఆ దేశ సైనికులు భయంకరమైన పరిణామాలను ఎదుర్కోవాల్సి ఉంటుందని ఇరాన్ హెచ్చరించింది.
“నరకానికి స్వాగతం” అనే శీర్షికతో ఇరాన్ అధికారిక ఆంగ్ల దినపత్రిక ‘టెహ్రాన్ టైమ్స్’ తన మొదటి పేజీలో ఒక కథనాన్ని ప్రచురించింది. ఇరాన్ మట్టిపై అడుగుపెట్టే అమెరికా సైనికులు శవపేటికల్లోనే తిరిగి వెళ్తారని ఆ పత్రిక హెచ్చరించింది.
యుద్ధం నెల రోజులు దాటినా..
అమెరికా, ఇజ్రాయెల్ కలిసి ఇరాన్‌పై చేస్తున్న యుద్ధం ప్రారంభమై నెల రోజులు దాటింది. యుద్ధం ఇంకా ముగియలేదు. ఇరాన్ వెంటనే లొంగిపోవాలని అమెరికా అధ్యక్షుడు డొనాల్డ్ ట్రంప్ కోరుతున్నారు, కానీ ఇరాన్ ఆయన మాటలను ఏమాత్రం పట్టించుకోవడం లేదు. తమ మాతృభూమిని కాపాడుకోవడానికి చివరి వరకు పోరాడుతామని, తమపై దాడి చేసిన వారిని వదిలిపెట్టబోమని ఇరాన్ ప్రతిఘటనను కొనసాగిస్తోంది.
పదాతి దళాల దాడికి ట్రంప్ సిద్ధమా?
మధ్యప్రాచ్యంలో (Middle East) అమెరికా తన సైనిక శక్తిని పెంచాలని నిర్ణయించుకుంది. అదనంగా మరో 10,000 మంది సైనికులను అక్కడికి పంపాలని అమెరికా యోచిస్తున్నట్లు ఆ దేశ మీడియా సంస్థలు నివేదించాయి. అమెరికా సైనికులు నేరుగా ఇరాన్‌లోకి ప్రవేశించి భూతలంపై యుద్ధం చేసే అవకాశం ఉంది. అయితే, దీనికి డొనాల్డ్ ట్రంప్ ఇంకా అధికారికంగా అనుమతి ఇవ్వలేదు. ఆయన గ్రీన్ సిగ్నల్ ఇస్తే అమెరికా బలగాలు ఇరాన్‌లోకి చొచ్చుకు వెళ్లే ప్రమాదం ఉంది.
అంతర్జాతీయ మీడియా కథనాలు
‘ది వాల్ స్ట్రీట్ జర్నల్’ ప్రచురించిన కథనం ప్రకారం.. ఫిబ్రవరి 28న ఇరాన్‌పై అమెరికా-ఇజ్రాయెల్ దాడులు ప్రారంభమయ్యాయి. వ్యూహాత్మకంగా మధ్యప్రాచ్యంలో పట్టు సాధించడానికి అమెరికా ఇప్పటికే వేల సంఖ్యలో పారాచూట్ దళాలను, నౌకాదళాలను పంపింది. త్వరలోనే మరిన్ని అదనపు బలగాలు వారితో చేరనున్నాయి. ఈ పరిణామాలు ఇరాన్‌పై త్వరలోనే ‘గ్రౌండ్ అటాక్’ జరుగుతుందనే ఆందోళనలను పెంచుతున్నాయి.
హూతీల ద్వారా ఎదురుదాడి
ఇరాన్ సైనిక అధికారి ఒకరు మాట్లాడుతూ.. “మాపై భూతల దాడి జరిగితే, యెమెన్‌లోని మా మిత్రపక్షాలైన హూతీ రెబల్స్ చేత దాడులు చేయిస్తాము. హూతీలు ఎర్ర సముద్రంలో నౌకాయానాన్ని పూర్తిగా నిలిపివేస్తారు. ఆ మార్గంలో వెళ్లే ప్రతి నౌకపై దాడులు జరుగుతాయి. ఇది యుద్ధాన్ని మరింత తీవ్రతరం చేస్తుంది” అని హెచ్చరించారు. ప్రస్తుతం ఇరాన్-అమెరికా మధ్య ఉద్రిక్తతలు పరాకాష్టకు చేరుకుని యుద్ధం మరింత భీకరంగా మారుతోంది.