రాజస్థాన్‌లోని చురూ జిల్లా, సర్దార్‌షహర్ ప్రాంతంలో జిమ్‌లో వ్యాయామం చేస్తూ ఓ ప్రభుత్వ పాఠశాల హెడ్‌మాస్టర్ అకస్మాత్తుగా కుప్పకూలి మృతి చెందిన ఘటన తీవ్ర విషాదం నింపింది.
మంగళవారం సాయంత్రం సుమారు 7 గంటల సమయంలో ఈ విషాద ఘటన చోటుచేసుకుంది. ట్రెడ్‌మిల్‌పై రన్నింగ్ చేస్తున్న సమయంలో అకస్మాత్తుగా బ్యాలెన్స్ తప్పి కిందపడిపోయిన ఆయన అక్కడికక్కడే స్పృహ కోల్పోయారు. ఈ ఘటనకు సంబంధించిన సీసీటీవీ దృశ్యాలు బుధవారం వెలుగులోకి వచ్చి తీవ్ర దిగ్భ్రాంతికి గురిచేస్తున్నాయి.
మృతుడిని బీర్బల్ మేవ్ (45)గా గుర్తించారు. ఈయన అసల్‌పసర్ ప్రాంతంలోని ప్రభుత్వ ఉన్నత పాఠశాలలో ప్రధానోపాధ్యాయుడిగా (హెడ్‌మాస్టర్) విధులు నిర్వహిస్తున్నారు. ఘటన జరిగిన రోజు సాయంత్రం సుమారు 6 గంటల ప్రాంతంలో ఆయన తన చిన్న కుమార్తె కవితతో కలిసి జిమ్‌కు వెళ్లారు. అక్కడ ఎక్సర్‌సైజ్ చేస్తున్న క్రమంలో ఒక్కసారిగా కిందపడిపోయారు. గమనించిన జిమ్ నిర్వాహకుడు వెంటనే ఆయనను రక్షించేందుకు ప్రయత్నించారు.
బీర్బల్ మేవ్ కిందపడగానే జిమ్ నిర్వాహకుడు సుమారు రెండు నిమిషాల పాటు అత్యవసర ప్రథమ చికిత్స అయిన సీపీఆర్ (CPR) అందించారు. అయినప్పటికీ ఆయన శరీరంలో ఎలాంటి స్పందన లేకపోవడంతో సమీపంలోని ప్రైవేట్ ఆసుపత్రికి తరలించారు. అక్కడ పరీక్షించిన వైద్యులు ఆయన అప్పటికే మృతి చెందినట్లు ధ్రువీకరించారు. ప్రాథమికంగా ఆయన గుండెపోటుతో మరణించి ఉండవచ్చని వైద్యులు అనుమానం వ్యక్తం చేసినప్పటికీ, పోస్ట్‌మార్టం నివేదిక వచ్చిన తర్వాతే మరణానికి గల కచ్చితమైన కారణం తెలుస్తుందని అధికారులు స్పష్టం చేశారు.
బీర్బల్ మేవ్ గత 20 ఏళ్లుగా విద్యాశాఖలో సేవలందిస్తున్నారు. 2006లో లెక్చరర్‌గా ఉద్యోగంలో చేరిన ఆయన, 2018లో పదోన్నతి పొంది ప్రధానోపాధ్యాయుడయ్యారు. ప్రస్తుతం ఆయన తన భార్య, ఇద్దరు కుమార్తెలతో కలిసి సర్దార్‌షహర్ ప్రాంతంలో నివసిస్తున్నారు. పెద్ద కుమార్తె పదో తరగతి, చిన్న కుమార్తె ఐదో తరగతి చదువుతున్నారు. కూతురితో కలిసి జిమ్‌కు వెళ్లిన సమయంలో ఇలా హఠాన్మరణం చెందడం కుటుంబసభ్యులను, స్థానికులను తీవ్ర శోకసంద్రంలో ముంచెత్తింది.
Leave a Reply