తమిళనాడు అసెంబ్లీ ఎన్నికల నేపథ్యంలో ఢిల్లీలో జరిగిన కాంగ్రెస్ పార్టీ కీలక సమావేశంలో డీఎంకే తీరుపై కొందరు కాంగ్రెస్ నేతలు తీవ్ర అసంతృప్తి వ్యక్తం చేసినట్లు తెలుస్తోంది.
మల్లికార్జున ఖర్గే, రాహుల్ గాంధీ మరియు కే.సి. వేణుగోపాల్ నేతృత్వంలో జరిగిన ఈ సమావేశంలో తమిళనాడు కాంగ్రెస్ ముఖ్య నేతలు పాల్గొన్నారు. గత పదేళ్లుగా డీఎంకేతో ఉన్న బంధంలో పగుళ్లు వచ్చాయా? డీఎంకేతోనే కొనసాగాలా లేక విజయ్ నేతృత్వంలోని ‘తమిళగ వెట్రి కళగం’ (TVK)తో జతకట్టాలా? అనే అంశాలపై చర్చలు జరిగాయి.
కాంగ్రెస్ నేతలు ఏమన్నారంటే? సమావేశంలో కాంగ్రెస్ నేతలు వ్యక్తం చేసిన కొన్ని ముఖ్యమైన అభిప్రాయాలు ఇవే:
- మన నేతలు కొందరు డీఎంకేను విమర్శించడంతో వారు అసహనంగా ఉన్నారు.
- అందుకే పొత్తుల చర్చల కోసం కమిటీని కూడా వేయకుండా మమ్మల్ని తిప్పుకుంటున్నారు.
- వారిపై ఆధారపడేలా (సరండర్ అయ్యేలా) మమ్మల్ని నిలబెడుతున్నారు, ఇది అంగీకరించలేని విషయం.
- ఎన్నికల ప్రకటన వచ్చిన తర్వాత కమిటీ వేస్తే మనకు సమయం ఉండదు. కేవలం రెండు వారాలే ప్రచారం చేయాల్సి వస్తుంది. డీఎంకే కావాలనే అలాంటి వాతావరణాన్ని సృష్టిస్తోంది.
- డీఎంకే అనుసరిస్తున్న ఈ టెక్నిక్ చాలా ప్రమాదకరం. చివరి నిమిషం వరకు చర్చలను సాగదీసి, మనకు వేరే దారి లేక వారు ఇచ్చినన్ని సీట్లే తీసుకునేలా ఒత్తిడి చేయబోతున్నారు.
- చివరి వరకు లాగితే మనకు వేరే ఆప్షన్ ఉండదు కాబట్టే వారు కావాలనే ఆలస్యం చేస్తున్నారు.
మారిన కాంగ్రెస్ గొంతుక: ఢిల్లీ మీటింగ్ తర్వాత తమిళనాడు కాంగ్రెస్ నేతల మాటల్లో మార్పు కనిపిస్తోంది. సమావేశం అనంతరం తమిళనాడు కాంగ్రెస్ అధ్యక్షుడు సెల్వపెరుందగై మాట్లాడుతూ.. “బీహార్ వంటి రాష్ట్రాల్లో చివరి నిమిషంలో పొత్తులు పెట్టుకోవడం వల్ల చాలా ఇబ్బందులు ఎదురయ్యాయి. తమిళనాడులో ప్రచారం చేయడానికి రాహుల్ గాంధీ సిద్ధంగా ఉన్నారు, కానీ డీఎంకే సిద్ధంగా ఉందా? సరైన సమయంలో పొత్తు ఖరారైతేనే పని చేయగలం. చర్చల కమిటీ వేయకపోవడంపై అందరూ అసంతృప్తిగా ఉన్నారు” అని తెలిపారు.