అమెరికాలోని లాస్ ఏంజెలెస్ నగరంలో ఉన్న బెంజమిన్ ఫ్రాంక్లిన్ హైస్కూల్‌లో, 4వ అంతస్తు నుంచి కిందపడి ఒక విద్యార్థి దారుణంగా ప్రాణాలు కోల్పోయిన ఘటన తీవ్ర దిగ్భ్రాంతిని కలిగించింది.
సెప్టెంబర్ 30న మధ్యాహ్నం 1 గంటల ప్రాంతంలో ఈ ఘటన జరిగింది. పాఠశాల ప్రాంగణంలో 4వ అంతస్తు నుంచి కింద పడి విద్యార్థి మృతి చెందడంతో, పోలీసులు దర్యాప్తును ముమ్మరం చేశారు. మరణించిన విద్యార్థి పేరు, వయసు వివరాలను అధికారులు ఇంకా వెల్లడించలేదు. ప్రాథమిక విచారణలో ఇతరుల ప్రమేయం లేదా కుట్ర ఉన్నట్లు (foul play) ఎలాంటి ఆధారాలు లభించలేదని లాస్ ఏంజెలెస్ పోలీసులు తెలిపారు.
ఈ ఘటన జరగడానికి ముందు తరగతి గదిలో ఇద్దరు విద్యార్థుల మధ్య తీవ్ర గొడవ జరిగిందని, వేధింపుల (బుల్లీయింగ్) కారణంగానే ఆ విద్యార్థి భవనం పైనుంచి దూకాడని చెబుతున్నారు. సోషల్ మీడియాలో వైరల్ అవుతున్న వీడియోలో, ఇద్దరు విద్యార్థులు తరగతి గదిలో కొట్లాడుకోవడం, ఉపాధ్యాయుడు వారిని ఆపేందుకు ప్రయత్నించడం రికార్డైంది. ఆ తర్వాత ఒక విద్యార్థి గదిలోంచి బయటకు వెళ్లగా, మరో విద్యార్థి అతడిని వెంబడించినట్లు, చివరకు ఆ విద్యార్థి పిట్టగోడ దూకి కింద పడిపోయినట్లు దృశ్యాలు ఉన్నాయి.
తరగతిలో ఎప్పుడూ సైలెంట్‌గా ఉండే ఆ విద్యార్థిని, గొడవ సమయంలో అతి దారుణంగా కొట్టారని, ఆ దెబ్బలు తట్టుకోలేకే 4వ అంతస్తు నుంచి కిందకు దూకేశాడని అక్కడున్న తోటి విద్యార్థులు తెలిపారు. ఈ ఘటనతో షాక్‌కు గురైన చాలామంది విద్యార్థులు కన్నీరుమున్నీరుగా విలపించిన దృశ్యం చూసేవారిని కలచివేసింది.
అయినప్పటికీ, ఈ వీడియోలు, సాక్ష్యాల వాస్తవికత గురించి, విద్యార్థిని వెంబడించారా లేదా వేధింపులకు గురిచేశారా అనే దానిపై పోలీసులు ఇంకా అధికారికంగా ఎలాంటి నిర్ధారణ చేయలేదు. తీవ్రమైన విచారణ కొనసాగుతోంది.
Leave a Reply