తమిళనాడులోని తూత్తుకుడి జిల్లాలో సభ్యసమాజం తలదించుకునేలా ఒక దారుణమైన ఘటన వెలుగుచూసింది. అక్రమ సంబంధం మోజులో ఒక కామాంధుడు నాలుగేళ్ల పసికందును బలితీసుకున్నాడు.
ఘటన వివరాలు: ఆరోక్యపురానికి చెందిన ఇసక్కి రాజ్ (20) అనే యువకుడికి కులశేఖరపట్నం ప్రాంతానికి చెందిన ఒక మహిళతో అక్రమ సంబంధం ఉండేది. ఆ మహిళ ఇంటికి వెళ్తున్న క్రమంలో, పక్కనే నాలుగేళ్ల కూతురితో ఒంటరిగా నివసిస్తున్న మరో యువతితో కూడా ఇసక్కి రాజ్‌కు పరిచయం ఏర్పడి అక్రమ సంబంధానికి దారితీసింది. ఆ తర్వాత సదరు యువతి ఉడంగుడిలోని చెట్టియాపాత్‌లో ఒక అద్దె ఇంటికి మారింది. అక్కడికి కూడా ఇసక్కి రాజ్ తరచుగా వెళ్తుండేవాడు.
ఒకరోజు ఆ యువతి ఇంట్లో లేని సమయంలో వెళ్లిన ఇసక్కి రాజ్, ఆమె నాలుగేళ్ల కుమార్తెపై లైంగిక దాడికి పాల్పడ్డాడు. ఈ క్రమంలో చిన్నారి స్పృహ తప్పి పడిపోవడంతో, నిందితుడు మరియు ఆ తల్లి కలిసి బిడ్డను ఆసుపత్రికి తీసుకెళ్లారు.
పోలీసుల విచారణలో షాకింగ్ నిజాలు: చిన్నారిని పరీక్షించిన వైద్యులు ఆమె అప్పటికే మృతి చెందినట్లు ప్రకటించారు. పోలీసులకు అనుమానం వచ్చి మృతదేహాన్ని పోస్టుమార్టం నిమిత్తం పంపారు. ఆ నివేదికలో చిన్నారి శరీరంపై గోళ్ల గీతలు ఉన్నాయని, ఆమె లైంగిక వేధింపులకు గురై హత్యకు గురైందని తేలింది. దీంతో పోలీసులు ఇసక్కి రాజ్‌ను అదుపులోకి తీసుకుని విచారించగా అసలు విషయం బయటపడింది.
నిందితుడి ఒప్పుకోలు: “నేను ఆ యువతి ఇంటికి వెళ్లినప్పుడు ఆమె అక్కడ లేదు. నా కన్ను ఆ నాలుగేళ్ల చిన్నారిపై పడింది. బిడ్డపై లైంగిక దాడి చేస్తుండగా ఆమెకు ఊపిరి ఆడక స్పృహ తప్పింది. ఆ సమయంలో ఇంటికి వచ్చిన తల్లితో.. పాపకు నీళ్లు తాగిస్తుంటే ముక్కులోకి వెళ్లి స్పృహ కోల్పోయిందని అబద్ధం చెప్పి నాటకమాడాను” అని నిందితుడు వాంగ్మూలం ఇచ్చాడు.
పోలీసులు ఇసక్కి రాజ్‌ను అరెస్ట్ చేసి, కోర్టులో హాజరుపరిచిన అనంతరం జైలుకు తరలించారు. అక్రమ సంబంధాలు పసిబిడ్డల ప్రాణాల మీదకు ఎలా వస్తున్నాయో చెప్పడానికి ఈ ఘటనే ఒక ఉదాహరణ.