తమిళనాడులో ఎన్నో అందమైన, బయటి ప్రపంచానికి పెద్దగా తెలియని (Hidden Gems) పర్యాటక ప్రాంతాలు ఉన్నాయి. ఇవి ప్రసిద్ధ పర్యాటక ప్రాంతాలకు ఏమాత్రం తీసిపోవు. తిరుచ్చి, పెరంబలూర్, మరియు సేలం జిల్లాల్లో విస్తరించి ఉన్న తూర్పు కనుమల శ్రేణిలోని ‘పచ్చైమలై’ అటువంటిదే.
ఈ పచ్చైమలై తిరుచ్చి జిల్లాలోని తొట్టియం ప్రాంతంలో ఉంది. ఇది సముద్ర మట్టానికి సుమారు 2,400 అడుగుల ఎత్తులో ఉంటుంది. సుమారు 19,076 హెక్టార్లలో విస్తరించి ఉన్న ఇక్కడి దట్టమైన అడవులు, మూలికల సువాసనలు మరియు చల్లని గాలులు పర్యాటకులను కట్టిపడేస్తాయి.
పచ్చైమలై ప్రత్యేకతలు:
- పచ్చదనం: పేరుకు తగ్గట్టే ఈ ప్రాంతం మొత్తం పచ్చని రంగు దుప్పటి కప్పుకున్నట్లు చెట్లు, తీగలతో నిండి ఉంటుంది.
- పక్షుల కిలకిలా రావాలు: ఇక్కడ 154 కంటే ఎక్కువ జాతుల పక్షులు ఉన్నాయి. పక్షుల మధురమైన శబ్దాలు వింటుంటే చెవుల్లో తేనె పోసినట్లు ఉంటుంది.
- జలపాతాలు: ఇక్కడ కోరైయార్, మంగళం మరియు మయిల్ ఊట్రు వంటి అందమైన జలపాతాలు ఉన్నాయి. ఆకాశం నుండి నీరు పడుతున్నట్లుగా కనిపించే ఈ జలపాతాల్లో పర్యాటకులు హాయిగా స్నానం చేయవచ్చు.
- వ్యూ పాయింట్స్: ఊటీ, కొడైకెనాల్ తరహాలో ఇక్కడ అద్భుతమైన ‘హిల్ వ్యూ పాయింట్స్’ ఉన్నాయి. ఇక్కడి నుండి పచ్చైమలై అందాలను కళ్లారా చూడవచ్చు.
- ట్రెక్కింగ్: సాహస ప్రియుల కోసం ఇక్కడ థ్రిల్లింగ్ ట్రెక్కింగ్ మార్గాలు కూడా ఉన్నాయి. పర్యాటకులు ఇక్కడ బస చేయడానికి పర్యాటక శాఖ ఆధ్వర్యంలో వసతి సౌకర్యాలు కూడా కల్పించారు.
మొత్తానికి ఈ ప్రాంతాన్ని “కుట్టి ఊటీ” (మినీ ఊటీ) అని పిలుస్తారు. మీరు ఇక్కడికి వెళ్లాలనుకుంటే, తిరుచ్చి నుండి సుమారు 70 నుండి 80 కిలోమీటర్ల దూరంలో ఉంటుంది. కేవలం 3 గంటల ప్రయాణంతో ఈ అందమైన ప్రాంతానికి చేరుకోవచ్చు.